Sekjer Marí: Opozisaun Hakarak Halo Golpe ba Governu Ne’ebe Eleitu Hosi Maioria

“Orsamentu ne’ebe atu kobre despeza ne’ebe nesesariu. Sira boikota funsionamentu Komisaun sira iha Parlamentu Nasional. Sira aprezenta mosaun sira laiha argumentu forti iha no laiha fundamentu”. Marí Alkatiri

Partidu Fretilin halao sorumutu Komite Sentral Alargadu ho nia strutura tomak ne’ebe mai hosi nivel nasional no sub-nasional. Tuir komunikadu imprensa hosi partidu Fretilin esplika katak objetivu hosi sorumutu ida ne’e atu halo analiza ba situasaun politika atual Timor-Leste nian, ho foku special ba tentative hosi partidu opozisaun atu kria instituisional, hodi fo dalan ba sira, atu halo asaltu ba poder no golpe ba governu ne’ebe eleitu hosi povu.

Liu hosi enkontru refere Sekretariu Jeral partidu Fretilin no Primeiru Ministru VII Governo Konstituisional, Dr. Marí Alkatiri hateten sira vota kontra governu, programa ne’ebe pro-povu. Sira vota kontra pedidu atu lori orsamentu retifikativu ba debate ho urjensia.

“Orsamentu ne’ebe atu kobre despeza ne’ebe nesesariu. Sira boikota funsionamentu Komisaun sira iha Parlamentu Nasional. Sira aprezenta mosaun sira laiha argumentu forti iha no laiha fundamentu. Buat sira ne’e hotu tanba deit hakarak halo golpe ba governu ne’ebe eleitu hosi mairoia”, esplika Marí Alkatiri.

Iha tempu hanesan Sekretariu Jeral Adjunto Fretilin, Jose Reis deklara katak opizisaun sira lakohi kolabora, lakohi komprende, laos konstrutiva no laiha bom sensu.

“Hare ba buat sira ne’e hotu. Ami (Fretilin) hanoin katak iha ona kondisaun sira hotu, atu Prezidente Republika bele foti desizaun ho konformiadi ho Konstituisaun RDTL no situasaun politika atual iha rai laran”, esplika Jose Reis.

Refere ba komunikadu imprensa Fretilin nian esplika katak partidu opozisaun sira, hosi memento dahuluk kedas iha Parlamentu Nasional, focus deit atu rejeita inisiativa hotu, la simu atu diskusaun ne’ebe konstruktiba no prontu deit atu vota kontra sujestaun no proposta sira hotu.

Sorumutu ne’ebe halao iha loron 2/12, iha CCF Loromata Dili, partisipa mos hosi deputadus Fretilin, membru governu no responsavel hosi organizasaun massa no organizasaun filiada sira. Kuadru sira hosi Fretilib diskuti kona ba aspetu oin-oin ne’ebe relasiona ho má fé hosi partidu opozisaun no deklara katak sira prontu atu kontinua luta ba soberania no bem estar nasaun nian no sira prontu atu rezisti ba tentativas golpe no asaltu poder.

TAFARA.TL tenta halo konfirmasaun ho partidu opozisaun (Prezidente bankada PLP no Bankada CNRT) liu hosi telefone, hodi hatoo sira nia hanoin, maibe sedauk hetan responde hosi bloku AMP.

TAFARA.TL sei tenta nafatin hodi kontaktu nafatin ho partidu opozisaun hodi hatoo sira nia hanoin, iha nutisia tuir mai.

@tafara.tl