Lere: Naimori Labele Tau An Hanesan Lider Istoriku

Xefe estadu Maior das Forsas Armadas, Maijor Jeneral  Lere Anan Timur afirma,  lideransa Partidu KHUNTO Jose Naimori labele tau an hanesan lider istoriku sira hanesan Mari Alkatiri, Kay Rala Xanana Gusmão, Taur Matan Ruak, Ramos Horta, no sira seluk ne’ebe mak pozisaun as liu.

“Lider sira iha Timor ne’e nivel la hanesan jovem ida karik nia rin labele hanesan ho hau, ne’ebe hau nia alin Nai-Mori labele tau an hanesan fali lider istoriku sira tanba sira nivel ida ne’ebe as liu tan hau,” dehan Lere ba Jornalista sira hafoin remata sorumutu ho Prezidenti Republika (PR) Francisco Guterres Lu-Olo iha Palasiu Prtezidensial Bairu-Pite Dili, Kuarta (25/11/2015).

Eis Guirileiru ne’e hatutan, Timor – Leste laiha lideransa masimu ne’ebe mak nia temi dala ruma, Timor – Leste seidauk hetan nia independensia.

“Ema ida labele hatun ema nia dignidade hau hanoin katak irmaun Naimori no Kalbuadi kuandu Taur tur iha sira nia klaran ne’e sira tenki orgulo ba ida ne’e, paling hau nia maun Taur ne’e mak hakraik an ona, hansa ne’e  mos seidauk to’o ne’e, ka imi hakarak tan saida, aban bainrua mos irmaun Mari, Xanana, Ramos no Abilio sei bolu hakuak imi hotu, ne’e onra bo’ot  ona ba imi enkuantu lider sira seluk seidauk hanesan ne’e,” dehan Lere.

Ema numeru ida iha F-FDTL ne’e akresenta tan katak, ukun rasik an ba Timor – Leste laos dalan ne’ebe fasil. Tanba ne’e nia husu ba jerasaun foun sira bele atu fo tempu tan ba lider istoriku sira atu kaer lai nasaun ne’e.

Nune’e nia husu ba lideransa sira hotu tenke toma konsiensia ho didiak nune’e labele mosu tan Krize iha Timor – Leste.

Tuir nia durante ne’e, nia mos halo observasaun ba debate iha Parlamentu Nasional maioria deputadu/a foinsae sira balun ne’ebe la tau konsiderasaun ba lider masimu hanesan PM Mari Alkatiri no Ministro Jose Ramos Horta.

@thetimor-news.com