Xanana: Ami Prontu Simu Responsabilidade

Prezidente partidu CNRT Kay Rala Xanana Gusmao deklara, Aliansa Maioria Parlamentar (AMP) pronto simu responsabilidade  hodi hasai povu husi krize politiku ne’ebe agora daudaun lao hela iha Timor – Leste.

“Ami hotu sente obrigasaun bo’ot, atu responde ba interese nasaun nian, ohin ami hare fila fali ba akordu partidu politiku entre, partidu 3 ne’ebe ma kami assina tia ona iha loron hirak liu ba, nudar partidu politika ami sente responsabilidade bo’ot katak ami tenke prepara an atu bele fo dalan diak ida hodi hasai povu husi krize politikuida ne’ebe mak agora iha,” Lider Masimu CNRT ne’e hato lia hirak ne’e bainhira halo inkontru ho Prezidente PLP Taur Matan Ruak no Konselleru masimu KHUNTO Jose Naimori iha Singapura, Tersa (20/11/2017).

Lider masimu ne’e hatutan, sira nia parte iha responsabilidade ne’ebe bo’ot no sei la fo kulpa ba ema ida relasiona ho kondisaun politika ne’ebe mak agora daudaun lao.

“Prezidente durante ne’e hakerek karta mai hau hodi dehan katak, sente orgullu tebes tanba situasaun ida ne’e iha aspeitu pozitivu bo’ot ida iha prosesu konstrusaun estadu, hau mos konkorda, Taur  Matan Ruak mos konkorda ho afirmasaun PR nian, katak situasaun hanesan ne’e maka atu bele lori ita kompriende diak liu tan prosesu konstrusaun estadu no nasaun,” dehan ema numeru ida iha CNRT ne’e.

Tuir lider hirak ne’e, dalan ne’ebe atu rezilve problema ne’ebe mak agora daudaun iha, so PR Francisco Guterres Lu-Olo mak bele foti dezisaun.

“Ami espera PR sei kumpri konstituisaun, ami mos sei fo apoiu tomak atu kumpri konstituisaun tanba konstituisaun mak garante vid aba estadu tomak no vid aba nasaun tomak,” dehan Xanana.

Tanba ne’e nia husu ba povu Timor – Leste tomak atu labele laran taridu iha difikuldade sira agora iha, tan iha aspeitu hirak hanesan ne’e make ma hotu bele tau hamutuk hanoin.

“Ami nain 3 sei bele lori knar ida ne’ebe karik, estadu tomak hotu simu, husu mos ba povu tomak atu hakmatek hanesan mos ohin loron, hau mos sente kontente tanba prezidente PLP no konselleru KHUNTO mai hato bah au katak povu tomak moris hakmatek hela, kapas ita hatudu maturidade politiku, ita hatudu ita iha kbi’it atu lori ita nia estadu ne’e ba oin,” dehan lider Rezistensia ne’e.

Nia dehan, sira la koalia buat barak maibe bloku ne’ebe iha atu responde ba situasaun ne’ebe agora mosu katak AMP pronto no sei la obriga ema ida liu-liu PR atu viola konstituisaun,” dehan ulun CNRT.

Bainhira PR fo fiar ba AMP sira nia parte pronto servi nasaun no povu hametin hodi kria estabilidade iha nasaun Timor – Leste.

@thetimor-news.com