L4 Ohin Baixa Hospital no Sei Dezloka ba Singapura

“Buat ida ita koalia politika hodi kontra malu ne’e buat ida, tanba hotu-hotu iha intensaun ida hodi buka dalan diak liu ba ita nia povu. Hau sente iha situasaun agora, balun aproveita situasaun hanesan iha Indonesia nian lia dehan “Keruh” ka abodiza” David Ximenes

Secretariu Estadu ba Asumtu Veteranu, Andre da Costa “L4” ohin iha oras 11:30 OTL baixa fila iha ospital Guidu Vadalares tanba hetan atakasaun ohin dader iha nia rezidensia.

Ba TAFARA.TL deputadu David Dias Ximenes, ne’ebe ba vizita L4 iha ospital, esplika katak iha dader mai kedas iha hospital hodi hare kondisuan L4.

“Ohin dader hau mai kedas iha ne’e, hau la hare ba partidu ba partidu saida deit. Iha ne’ekonsensia veteranu ida katak terus hamutuk iha susar nia laran ita lao hamutuk. Politika ne’e buat ida, ita nudar ema ne’ebe iha konsensia ho hatene katak iha portugues nia lian dehan kuandu o susar nia laran iha ospital ka kadeia, mak o foin hatene se mak o nia maluk. Uluk mos ita iha susar nia laran, funu ne’e la hotu-hotu hakarak halo,ita tauk iha, maibe balun brani tenke fo an depois ohin loron sai diak. Buat ida ita koalia politika hodi kontra malu ne’e buat ida, tanba hotu-hotu iha intensaun ida hodi buka dalan diak liu ba ita nia povu. Hau sente iha situasaun agora, balun aproveita situasaun hanesan iha Indonesia nian lia dehan “Keruh” ka abodiza, ida ne’e mak dalaruma hau laran moras oituan, maibe ema ne’ebe uluk luta hamutuk ne’e, iha nia fuan kiik oan ne’e sei koalia dehan, ita sei lao hamutuk”, esplika Deputadu Fretilin

David Ximenes informa ba jornalista katak hosi parte governu liu hosi Ministeriu Saude hare ona direitamente no dokumentus L4 nian governu prepara ona hodi desloka ba Singapore.

“Ministeriu Saude kontaktu on aba Singapora, hau koalia ho director veteranu nian dehan katak veteranu osan iha hela mais iha Singapora ho Indoneia hakarak haree uluk lai CPV, sira haruka ona ba. Mediku sira iha ne’eba sei prepara no sei fo resposta mai hodi lori sai kedas L4 ba Singapora”, esplika David Ximenes

Hatan ba pergunats hosi TAFARA.TL kona ba urjensia OR ne’ebe mak rejeita ona iha Parlamentu Nasional, no governu seidauk bele selu dividas ba iha hospital sira hanesan Singapura no Indonesia, ida ne’e bele fo impaktu ba ospital sira atu simu pasiente hosi Timor?

David Ximens responde katak dividas ne’e iha duni, maibe sera que tenke halimar ho moras sira?, “tanba deit divida deit ita tenke husik ita nia ema sira mate? Entaun nasaun ne’e atu saida? Estadu nafatin halo negosiasaun ho hospital refere maske sedauk selu maibe tenke tenta nafatin. Iha ona “lampu” verde para depois fo atensaun ba ita nia moras sira. Ita nia governu kompromente an katak tenke selu, walaupun urjensia ne’e ami koalia, ami husu ba urjensia sira la fo, maibe laiha buat ida, entaun governu tenke fali dalan seluk, tanba ita nia ema tenke salva, ita laos atu halimar fali ho ema nia vida”.

Informasaun ne’eb jornalista rekolha katak aban ka bainrua L4 sei desloka ba Singapora hodi bele hetan tratamentu intensivu.

Jornalista sira koko atu halo entrevista ho familia hosi L4 no dotor sira maibe sedauk prontu atu informa ba jornalista sira, liga ho kondisaun saude L4 nian. Agora dadauk L4 baixa iha VIP Ospital Guido Valadares Bidau Dili.

@tafara.tl