Governu desvia programa ho OR, Opozisaun insiste la apoia

Bankada opozisaun iha Parlamentu Nasional (PN), konsidera VII Governu la hakruk ba konstituisaun tamba koko desvia hodi la haruka uluk programa Governu nian ba daruak hodi diskuti, maibe hatama uluk fali Orsamentu Retifikativu (OR). Tamba ne’e, bankada opozisaun insiste sei la apoia OR ne’e.

Tuir Xefi bankada CNRT, Arão Noe, katak, Orsamentu Retifikativu ne’e, prosesu normal husi Governu ida ba Governu seluk, maibé tenki la’o tuir lei ne’ebé vigora ona.

“Laiha dalan ba Governu atu aprezenta uluk Orsamentu Retifikativu, kuandu programa Governu nian seidauk pasa iha PN. Problema ne’e la’os Orsamentu Retifikativu, problema ne’e iha programa Governu. Programa Governu ne’e tenki aprezenta uluk lai, mak Governu bele iha kompetensia atu aprezenta lei sira seluk,”katak Arão Noe ba jornalista sira iha PN  Segunda (13/11/17).

Nia esplika, programa Governu ne’e mak fatór determinante ba Governu ida, tanba agora ne’e foin mak iha prosesu ida harii Governu.

“Tuir Konstituisaun artigu 109 hateten katak, programa Governu tenki aprova uluk lai, mak tama ba orsamentu Jeral Estadu,”katak Arão Noe, hodi la simu tátika polítika ne’ebé VII Governu hala’o durante ne’e.

Tanba ne’e, bankada opozisaun kompostu husi bankada tolu hanesan, CNRT, PLP, KHUNTO iha Parlamentu Nasional sei atua tuir konstituisaun.

Alende ne’e, deputadu Antoninho Bianco husi bankada FRETILIN, husu ba deputadu bankada opozisaun sira atu apoia OR ne’e.

“Haree no lee lai, tanba la’os Parlamentu Nasional mak atu aprezenta orsamentu Retifikativu ka orsamentu jeral Estadu, tanba kuandu Governu la konsege aprezenta buat ruma ba povu, Governu mak sala nafatin,” katak Antoninho.

Programa Governu nian ba dahuluk hetan sumba iha Parlamentu Nasional, tamba hetan rejeisaun iha Parlamentu Nasional ho votus a favor 35 kontra 30 no abstensaun 0. Bankada opozisaun konsidera VII Governu ne’ebé forma deit ho minoratariu husi FRETILIN no PD la konsege garante estabilidade Governativa ba tinan lima nia laran no iha risku boot teb-tebes. Tamba ne’e, VII Governu ne’ebé lidera husi Primeiru Ministru, Mari Alkatiri tenki hatama fila fali programa Governu nian ne’ebé hetan rejeisaun ne’e ba Parlamentu Nasional iha parte daruak nian atu bele hetan aprovasaun. Maibe pelo contrario Governu hatama uluk fali Orsamentu Retifikativu. Tamba ne’e, bankada opozisaun sira konsidera ne’e la tuir ona dalan konstituisaun.

Tuir konstituisaun RDTL artigu 109 (Apresiasaun ba Governu nia Programa) iha númeru ida (1) hatete katak, Programa Governu nian sei hato’o ba Parlamentu Nasionál atu hetan apresiasaun, no Parlamentu la funsionál karik, tenki konvida ka konvoka sira ba asuntu ida-ne’e; iha númeru rua (2) hatete katak, debate programa governu nian labele liu loron lima, no to’o remata, grupu ida-idak iha Parlamentu bele husu atu lasimu, eh Governu bele husu votu konfiansa ida; nune’e iha númeru tolu (3) hatete, atu lasimu programa Governu nian, tenke iha apoiu mai husi maioria deputadu husi sira-ne’ebé sei hala’o hela knaar.

@gmntv.tl