Xanana Prontu Serve Estadu

Prezidente Partidu Congresso Nacional Reconstrução Timor-Leste (CNRT), Kay Rala Xanana Gusmão, firme nafatin hodi la envolve-aan iha Governu. Maibé, ‘kebit ona’ Primeiru Ministru, Mari Alkatiri katak sei kontinua serve Estadu.

Xefe Governu, Mari Alkatiri hateten, desizaun ne’ebé Xanana Gusmão foti ona klaru, maibé sei hamriik nafatin hodi kontribui ba Estadu.

“Maun Boot Xanana Gusmão sei halo ninia funsaun atu serbí Estadu. Nia la presiza atu tama iha governu, ne’e buat ne'ebé nia hakarak, ha’u sei respeita nia desizaun”, dehan nia, hafoin serimónia tomada-de-pose daruak ba membru VII Governu Konstitusionál, iha Palasiu Prezidensiál Ai-Tarak Laran, horisehik.

Alkatiri esplika, lisaun ida mak nia (Alkatiri) hatudu ona, kuandu serbí Estadu liu husi kaer knaar nu’udar autoridade ZEEMS. Tanba, bainhira hamutuk ho Xanana ba Banku Mundiál Fundu Monetáriu Internasionál (FMI) kontinua serbí Estadu maski la’ós membru governu.

Ne’e duni, agora daudaun VII Governu Konstitusionál planeia ona atu kontinua implementasaun Planu Estratéjia Dezenvolvimentu Nasionál (PEDN), iha área Supply Base, Liquid Natural Gas (LNG) Refinaria no Beasu inklui mós dezenvolvimentu nasionál tomak.

Nia hateten, husi diskursu ne'ebé nia mensiona baze ba dezenvolvimentu mak PEDN liu husi giaun ida ne’e mak Governu sei halo ba tinan lima oin mai.

@independente.tl