FRETILIN konsidera formasaun AMP laiha baze legal

Bankada FRETILIN iha Parlamentu Nasional (PN), konsidera formasaun Aliansa Maioria Parlamentar (AMP) iha PN laiha baze legal, tanba laiha asinatura husi lider máximu hanesan Kay Rala Xanana Gusmão ho Taur Matan Ruak ne’ebé lidera partidu segundu no terseiru mais votadu.

Xefi bankada FRETILIN, Francisco Branco, hateten, segundu konferensia partidu CNRT nian  hodi revoga fali rezolusaun primeiru konferensia ne’e, polítika interna kada partidu nian.

“Bai-bain Aliansa Maioria Parlamentar ne’e, tenki asina husi lider partidu sira, ami la hatene aliansa ne’e baze legal ne’e iha ne’ebé,”katak Francisco Branco ba GMN iha PN, Segunda (06/11).

Branco espera katak, aliansa entre partidu tolu ne’e (CNRT, PLP no KHUNTO) bele iha revogasaun ida atu bele sai forte liu, tenki iha asinatura husi lider partidu sira.

“Governu ne’e atu kontra la kontra konstituisaun ne’e, tenki rekore ba Tribunal Rekursu atu haree inskonstitusionalidade, ita ko’alia de’it hanesan ne’e, ita la fó edukasaun sívika ba ita-nia sosiedade,”katak Branco.

Nune’e mós, Xefi bankada Partidu Demokrátiku (PD), Maria Teresa, hateten, iha sistema demokrátiku, andamentu polítika mak hanesan ne’e duni.

“Maibé demokrásia ne’ebé PD kaer mak, la’os jogu demokrásia, maibé kultura demokrásia, no polítika ne’ebé PD kaer mak, polítika ulun samea, maibé étika polítika ne’e manu falur,”katak Maria Teresa.

Nia hatutan, ohin loron ema ida-ida ko’alia tuir buat ne’ebé mak sira-nia hakarak.

“Kona-ba konstitusional ka la’e Governu ida ne’e, Tribunal Rekursu mak sei deside atu haree los ne’e mak ida ne’ebé, tanba ohin loron ema halo interpretasaun ba lei konforme nia hakarak no gostu,”katak Maria Teresa.

Iha segunda konferensia partidu CNRT nian ne’ebé hala’o iha Domingu foin lalais ne’e, hasai ona rezolusaun ida hodi ratifika plataforma polítika ne’ebé hala’o ho partidu PLP no KHUNTO, no fó autorizasaun ba Komisaun Polítika Nasional husi partidu CNRT hodi halo negosiasaun no asina akordu polítika ida ba formasaun Aliansa Maioria Parlamentar no respeita ba prinsipiu polítika ne’ebé hatuur iha plataforma polítika ne’ebé ratifika ona.

@gmntv.tl