Alkatiri:Lalika taridu ho polítika rai laran

Primeiru Ministru (PM), Mari Alkatiri, husu ba ema hotu atu garante paz no estabilidade iha rai laran, no lalika laran taridu ho situasaun polítika ne’ebé akontese oras ne’e dadauk.

“Ha’u fiar nafatin katak situasaun ne’e temporariu, tamba ha’u hatene saida mak ami ida idak nia hanoin, saida mak ami idak idak hakarak, tamba ne’e ha’u fiar ne’e tranzisaun ida para ita bele buka dalan ida los liu atu lori prosesu ne’e ba oin,”dehan Mari Alkatiri iha diskursu kongresu daruak Comite 12 de Novembro, Tersa (7/11/2017) iha Centro Convenções de Dili (CCD).

Nia hatutan, iha Parlamentu Nasional iha deputadu balun konkorda, balun la’e, klaru parlamentu nia funsaun mak nune’e duni. Maibe nu’udar lideransa politika tenki buka dalan.

“Bainhira sosiedade tomak eziji, ami-nia dalan mós klot ba bebeik, ses malu mos la bele ami sei hasoru malu, ezijensia ne’e mai husi kraik mai ami atu hasoru malu, ami-nia dalan mak ida ne’e duni tenki hasoru malu la iha dalan seluk,”akresenta Alkatiri.

Tamba ne’e, nia husu ba ema hotu nafatin garante paz no estabilidade, no mós ho kuadrus tomak iha Timor Leste nia kontribuisaun, povu tomak sei tur hakmatek.

“Ita sei buka dalan no sei hetan duni dalan ne’e, atu lori dezenvolvimentu mai rai ida ne’e, hodi fo benefisiu ba ita-nia povu tomak. Ha’u-nia mensajen badak deit, ha’u prontu atu koalia, ha’u prontu atu hetan intendimentu, ne’e misaun ida intrega mai ha’u, ha’u hakarak lori misaun ne’e ho diak bainhira ema hotu hotu kontenti,” dehan Alkatiri.

@gmntv.tl