PR Lú Olo: Ema interpreta konstituisaun tuir interese ParPol

Prezidente Repúblika (PR) Francisco Guterres ‘Lú Olo’, preokupa, wainhira maluk barak interpreta konstituisaun tuir ida-idak nia ajenda polítika Partidu Polítiku (ParPol) nian.

“Ideias oi-oin ne’ebé mosu iha prosesu hanoin lisuk kona-bá formasaun ba ita-nia Governu ba mandatu 2017-2022 depende husi hanoin nain ninia pozisaun polítika rasik, maibé ha’u haree katak maluk balun buka interpreta konstituisaun buka interpreta konstituisaun RDTL tuir ajenda polítiku ParPol ida-idak nian, tendensia ida ne’e halo ha’u laran taridu,” PR Lú Olo liu husi ninia diskursu hafoin loke abertura ba segundu kongresu Comite 12 Novembro ne’ebé hala’o iha Centro Convenções de Díli (CCD), Tersa (07-11-2017).

PR Lú Olo husu ba lider ParPol sira hotu atu tane interese nasional bo’ot liu interese grupu.

“Ha’u fó hanoin ba ParPol sira katak molok eleisaun lejislativa iha loron 16 Juñu 2017, ParPol 21 hatan ha’u-nia apelu no sira asina iha ha’u-nia oin deklarasaun konjunta ida ho pontu 11 iha Palasiu Prezidensial, pontu 8 hateten ParPol sira sei hakotu ba desizaun sira nian ne’ebé hatuun liu husi sira-nia votus iha eleisaun ne’ebé livre no demokrátiku,”dehan Francisco Guterres Lú Olo.

Nia akresenta, nuudar PR ne’ebé hadomi povu no nasaun molok foti desizaun polítika kona-bá formasaun Governu, lee no interpreta di-diak artigu sira ne’ebé kaer ba malu iha konstituisaun RDTL kona-bá formasaun Governu no PR ninia kompetensia ba knaar ida ne’e.

“Artigu 106 konstituisaun RDTL fó kbiit no kompetensia tomak ba ha’u nuudar PR atu hili ParPol ne’ebé maka manan eleisaun ho votus barak liu ka aliansa ParPol ho maioria parlamentar, ParPol ne’ebé manan eleisaun maka FRETILIN, biar nune’e ha’u la bolu kedas atu forma VII Governu, hafoin rezultadu eleisaun fó sai iha Jornal da República iha dia 1 Agosto 2017,” haktuir PR.

Depois publikasaun rezultadu eleisaun iha Jornal da República nuudar PR, bolu kedas ParPol 5 ne’ebé hetan asentu iha PN, hodi rona sira-nia perspektiva polítika ba rezultadu eleisaun lejislativa ikus liu, haree ba ambiente simu malu husi ParPol sira PR foti desizaun polítika nomeia Mari Alkatiri sai Primeiru Ministru ba mandatu 2017-2022.

Diálogu mak dalan diak

Nune’e mós, atu solusiona tensaun polítika ne’ebé oras ne’e dau-daun akontese iha rai laran, Prezidente Repúblika (PR), Francisco Guterres ‘Lú-Olo’ afirma katak, diálogu entre Partidu Polítika (ParPol)maka dalan diak hodi fo susesu ba Governu.

“Diálogu importante tebes atu garante demokrasia no susesu ba Governu ida ne’ebé de’it, maibé diálogu labele iha susesu sé parte ida la sei oin ka lakohi rona parte seluk,” PR Lu-Olo liu husi ninia diskursu hafoin loke abertura ba segundu kongresu Comite 12 Novembro ne’ebé hala’o iha Centro Convenções de Díli (CCD), Tersa Feira (07-11-2017).

Nia esplika, problema boot liu la’os Governu maioria ka minoria, opozisaun forti ka fraku, problema importante liu maka oinsa iha relasaun ba malu atu tane ás interese nasional.

“Bainhira ita koalia kona-bá interese nasional, ita haree uluk liu maka programa dezenvolvimentu ba tinan 5 no Orsamentu Jeral Estadu atu implementa asaun ba tinan ida-idak, signifika ita tenki tau ita nia matenek hamutuk atu hala’o programa dezenvolvimentu hodi hadi’a povu nia moris ohin loron no abanbairua ninian,” dehan Prezidente Repúblika.

Nia akresenta katak, maluk balun hanoin katak númeru deputadus maka fator importante ka desizivu liu ba estabilidade Governu ne’ebé de’it, deputadu sira iha liberdade atu hari’i bloku ka aliansa, halibur númeru deputadus boot, biar liu maioria absoluta.

“Maibé ida ne’e la garante katak Governu ida bele to’o rohan, sé interese nasional la tau iha leten, sé populasaun buras ba bei-beik, sé dezempregu aumenta ba bei-beik, problema kiak la rezolve, estrada át ba bei-beik, bee moos laiha nafatin, Governu ne’ebé de’it bele monu tanba la satisfas eleitores nia hakarak,”relata PR Lú Olo.

Nia informa katak, iha rai balun Governu monu, tanba movimentasaun husi sosiedade sivil rasik, tanba ida ne’e maka nuudar PR apela hodi husu ba lider ParPol sira atu hamutuk fó liman ba malu.

“Iha prosesu demokrátiku hanesan ita nian, ita bele iha Governu ho maioria ka Governu minoria, primeira vez ita hasoru situasaun harii Governu ho minoria ba mandatu tinan 5, maibé Governu ho minoria bele funsiona no bele ukun ho diak, se iha vontadi atu kontribui husi partidu hotu-hotu,”haktuir Prezidente Repúblika.

Antes ne’e, Prezidente Partidu Libertasaun Popular, nu’udar mós eis Prezidente Repúblika, Taur Matan Ruak, hatete, iha konstituisaun RDTL la hatete katak, atu garante estabilidade Governativa VII Governu ne’ebé forma ho minoria (FRETILIN, PD) ba tinan lima nia laran tenki hetan apoiu husi parte opozisaun ka Aliansa Maioria Parlamentar.

@gmntv.tl