PM Alkatiri konsulta programa governu ho sosiedade sivil

Primeiru Ministru (PM), Mari Alkatiri, Sesta (27/10/2017), konvida sosiedade sivil sira hodi konsulta programa VII governu nian  ne’ebe hetan rejeisaun husi opozisaun maioria parlamentar.

PM Alkatiri espera katak ho konsultasaun ne’e bele hetan imput diak husi sosiedade sivil sira no konvida mos sosiedade sivil bele sai parseiru Governu nian atu hamutuk implementa programa Governu nian ba planu dezenvolvimentu.

PM Alkatiri fiar katak sosiedades sivil sira iha kontaktu dereta ho povu, liu husi ida-idak nia area espesialidade. Tanba ne’e, Alkatiri dehan, sopsiedade sivil nia nia kontribuisaun importante teb-tebes ba VII Governu.

“Sosiedade sivil rasik dehan programa VII Governu nian ne’ebe Bloku Maioria Parlamentar rezeita ne’e diak teb-tebes, no sira rasik hakarak partisipa iha implementasaun programa ne’e,” informa Mari Alkatiri ba Jornalista sira hafoin sorumutu ho Sosiedade  sivil, iha Palasio Governu, Sesta (27/10/2017).

Iha fatin hanesan, Direktur Ezekutivu FONGTIL, Arsenio  da Silva, hateten, sosiedade sivil sai parseiru Governu nian la’os foin iha VII Governu, maibe desde primeiru Governu kedas.

“Ami kumpri konvite ne’ebe Primeiru Ministru rasik fo mai mai sosiedade sivil para atu halo sorumutu, ba ami sosiedade sivil li-liu ONG Forum sai parseiru ho Governu la’os foin VII Governu, maibe desde kedas Primeiru Governu, tanba ne’e maka ami mai halo dialogu ho Xefi Governu ba asuntu barak no serbisu balu ne’ebe ami halo,” dehan Arcenio da Silva.

Liu husi sorumutu ne’e Sosiedade sivil ho Primeiru Ministru tau hanoin hamutuk ba programa sira ne’ebe implementa ona, no mos programa Governu nian ne’ebe sumba, husu opiniaun pozitivu sosiedade sivil nia hanoin ba programa refere.

“Programa sira ne’ebe uluk ami halo liu husi rezultadu monitorizasaun, sira ne’e maka ami hato’o ba Primeiru Ministru, buat balu ne’ebe ami husu para kontinua hanesan auditório social ne’ebe antes iha ona akordu, no mos fundus ba socidade civil nian para kontinua programa,” hateten Arsenio da Silva.

Programa ne’ebe sai mos hanesan papel sosiedade sivil nian maka hanesan, agrikultura, bee mos, jeneru no mos programa seluk ne’ebe relasaun ho povu nia moris.

@gmntv.tl