Halo fiskalizasaun, deputadu sena malu iha kareta ida

Semana ne’e nia laran, deputadu VI lejislatura halo ona fiskalizasaun ba projetu Estadu hahú husi sidade Dili. Iha fiskalizasaun ne’e, deputadu na’in tolu, hat tenki sa’e sena malu hamutuk kareta ida, tanba kareta ba sira seidauk iha.

Prezidenti Komisaun E, ne’ebé trata asuntu infra-estrutura, Abel Pires husi bankada PLP hateten, depois VI lejislatura estabelese, komisaun E foin mak halo fiskalizasaun dala ida, tanba Parlamentu Nasionál preokupa liu ho programa Governu nian.

“Kona-ba kareta, ha’u hanoin diak hela, naran kareta nia kondisaun ne’e diak, entaun ida ne’e la’os problema bo’ot, kestaun lojistika nian, Parlamentu Nasionál sei rezolve,”katak Abel Pires ba jornalista sira iha Tuana Laran, Kinta (27/10), hafoin halo fiskalizasaun ba estrada refere.

Nia hatutan, komisaun E simu ona lista projetu barak atu halo fiskalizasaun, tanba projetu sira ne’e halo ho osan povu nian.

Alende ne’e, deputadu Manuel de Carlvalho ‘Lito Rambo’, husi bankada PD mós hateten, fiskalizasaun ne’e, sira uza sira-nia kareta privadu.

“Ami uza ami-nia kareta privadu, no ense mina rasik, maibé ida ne’e la’os problema, ita tenki  kontribui ba ita-nia Estadu,” katak Lito Rambo.

Nia hatutan, Timor-oan hotu tenki fó kontribuisaun ba Estadu Timor Leste, hodi dudu dezenvolvimentu ba oin, atu povu bele hetan moris diak.

Entretantu tuir informasaun husi Parlamentu Nasionál katak, kareta Prado terseira lejislatura nian para hela iha Parlamentu Nasionál, maibé deputadu VI lejislatura lakohi uza, tanba kareta sira ne’e sei problema hela.

Antes ne’e mós, Konsellu Administrativu Parlamentu Nasionál deside ona atu kontinua leilaun kareta Prado terseira lejislatura nian, no hola fali kareta foun ba deputadu VI lejislatura.

@gmntv.tl