MAP Estabelese Tanke Ikan Ba Agrikultores

Ministeriu Agrikultura e Peskas (MAP) halao workshop loron ida ho setor privadu rai laran, inklui nasaun doadores neebe maka durante nee fo ona apoiu oi-oin no iha ona planu atu estabelese tan tanke hakiak ikan ba Agrikultores iha TL.

Liu husi Intervista Ministru Agrikultura e Peskas (MAP), Estanislau Aleixo da Silva hateten, workshop ida nee importante tebes tanba agora Ministeriu Agrikultura e Pesca establese tan ona, tanke Agrikultura iha Munisipiu hotu-hotu hodi produs ikan, tan nee povu iha area rural la susar atu sosa ikan.

Hau hanoin liu husi estabelesimentu Agrikultura nee atu fasilita diak liu tan, povu iha baze oinsa atu kria servisu ba sira nia aan, kria servisu ba aan liu husi hakiak ikan tanba, ida nee hanesan atividade neebe atu dezenvolve ekonomia iha rai laran,” informa Ministru Agrikultura Pesca, Estanislau Aleixo da Silva ba Jornalista, Kuarta (20/09/2017) iha Hotel Arbiru Beach Pantai Kelapa Dili.

Nia hatutan, knaar Ministeriu Agrikultura nian maka atu hasae seguransa alimentar iha rai laran, oinsa atu hasae kuantidade no kualidade tanba konsume Ikan nee importante ba ema nia saude.

Tuir Ministru nee katak, Agrikultura sei kria mos kampu servisu ba Timor oan sira no dezenvolve setor privadu rai laran sira oinsa atu hola parte iha atividade negosiu ikan no hakiak ikan. Tanba haree ba atividade nee importante tebes ho razaun nee tama iha planu prioridade Ministeriu agrikultura nian atu halo dezenvolvimentu.

Iha fatin hanesan Vice Prezidente Camara Comersiu industria TL CCI-TL, Rui Castro hateten, inisiativa neebe maka Ministeriu Agrikultura halo nee, importante tebes tanba nee setor privadu rai laran prontu atu hola parte, liu liu atu dezenvolve setor Agrikultura diak liu tan.

Ita haree governu kria ona kondisaun hanesan tanke iha Munisipiu sira, estabelesementu tanke nee atu hakiak ikan neeba, no oinsa atu involve mos setor privadu sira iha laran, tanba knaar governu nian maka kria kondisaun maibe atu implementa iha baze nee, fila fali ba inisiativa ema ida idak nian,”informa nia.

Nunee mos Embaixadora Nova Zelandia Vicky Pool hateten, TL iha potensial boot atu habelar Agrikultura iha teritoriu tomak, liu husi serbisu hamutuk ho governu, Setor privadu, nomos NGO sira hodi fo benefisiu ba konsumedores no Agrikultores iha TL.

“Hau haree governu TL iha komitmentu atu haboot industria Agrikultura iha rai laran, ho nunee bele hasae nutrisaun povu nian iha rai laran, liu liu atu konsume ikan rai laran, tanba nee governu Nova Zelandia nafatin apoiu governu TL hodi lori setor Agrikultura nee ba povu hodi moris diak,”informa nia.

*STL