Francisco Borlaco tama kadeia tinan hitu

Tribunal Distrital Dili liu husi leitura akordaun juiz Eusebio Xavier, kondena arguidu Francisco Borlaco ho pena prizaun tinan hitu no selu indeminizasaun dolar Amerikanu rikun U$ 106 resin.

Tribunal kondena Borlaco ho pena ne’e, tanba faktus produs katak kondenadu komete duni krime korupsaun ho partisipsaun ekonomia de negosiu, ne’ebe Ministeriu Publiku (MP) akuza ba arguidu.

Iha akuzasaun MP konfirma deskunfia arguidu halo pedidu pagamentu hodi haruka ba Ministra Finansas atu halo pagamentu ba kompañia Margin construction hodi halo konstrusaun ba hospital referal Baucau, maibe iha pagamentu ikus orsamentu ba fali konta bankaria privadu.

Ho arguidu nia hahalok ne’e mak tribunal konsidera arguidu fo prejuiju ba Estadu hodi transfere osan Estadu ba konta bankaria privadu, laiha kuñesemntu husi Ministeriu Saude inkluindu Ministeriu Infrastruktura.

Hafoin desizaun, defensor publiku Câncio Xavier lamenta ho desizaun tribunal nian, nune’e nia sei halo rekursu ba Tribunal de Recurso (TR).

Tuir nia tribunal failla halo observasaun ba faktus hotu ne’ebe durante ne’e aprezenta, hodi foti desizaun sala ba nia kliente.

“Hau lasimu desizaun ne’e, hau sei halo rekursu. Buat ne’e  Ministru Infrastruktura Pedro Lay mak sertifika sertidaun hodi halo orientasaun ba aprovizionamentu nasional Ministeriu Finansas atu halo  pagamentu ba konstruksaun Hospital Referal Baucau inklui Ministeriu Saude ne’ebe nain ba projetu ne’e, aprovizionamentu la tun ba halo pagamentu, kuandu sira la hetan sertidaun pagamentu aprovizionamentu nasional la halo,’’ dehan Câncio ba jornalista sira iha TDD, Sesta (15/09).

Tuir lei sura husi loron Segunda tempu ba sira durante loron 15 atu halo rekursu, nune’e agora nia sei halo preparasaun hodi hatama rekursu ba TR.

Antes ne’e tuir akuzasaun husi Ministerio Publiku katak iha Fulan Janeiru to’o Dezembru tinan 2007-2008, ministeriu saude loke  tenderizasaun ba kontrusaun Hospital refere Baucau.

Orsamentu ba projetu konstrusaun ba Hospital refere Baucau ho montante dolar Amerikanu miliaun 4.  Ne’ebe manan husi kompañia internasional Margin construction husi Korea Sul  ho nia director nia naran Untaek Yi . Ne’ebé obra refere nia fisiku atinji 4%, maibe kompañia hahu abandona.

Iha tinan 2008, arguidu hanesan Diretor Nasional aproviosinamentu  husi  Ministeria Finansa  lider husi eis Ministra Finansas  ne’ebé nu’udar mós arguida ba kazu sosa kama, halo pedidu pagamentu ba projetu ne’e, mesmu projetu ne’e abandonadu.

Total osan ne’ebe arguidu mensiona iha pedidu pagamentu haruka ba Ministra Finasas  hamutuk $107.028.34. Osan ne’e transfere direita ba konta bankaria privadu ho naran Leonito Freitas  Belo ho Americo Diaz, laos ba kompania Margin. Mesmu projetu ne’e governu halo ona pagamentu ona ba dala rua.

Audensia  julgamentu preside husi juiz koletivu, Eusebio  Xavier, Jacinta Correira, Ana Paula  Fonceca. Ministeriu Publiku reprezenta husi Prokurador Lidia Soares no arguidu hetan asistensia legal hosi defensor Publiku  Câncio Xavier.