Partidu mais votadu FRETILIN, Partidu Demokrátiku no KHUNTO, asina ona plataforma koligasaun hodi forma VII Govermu konstitusionál, maibé Sekretáriu Jeral Partidu FRETILIN, Mari Alkatiri konsidera, konkordansia partidu tolu ne’e la’os atu fahe poder, maibé atu partisipa iha Governu hodi servi povu.

Alkatiri haktuir, VII Governu ne’e, FRETILIN hakarak implementa kultura polítika foun. “Kultura polítika foun ne’e, se mak manan, nia mak lidera hotu. Balu dehan fali hanesan, Prezidenti Repúblika ema FRETILIN, Prezidenti Parlamentu ema FRETILIN, Primeiru Ministru mós FRETILIN. Se ita hakarak atu implementa kultura polítika foun ne’e mak ida ne’e duni, se mak manan, nia mak lidera.

Ida ne’e hanaran unicidade do poder, labele fahe poder, tanba ita la halo koligasaun atu fahe orgaun de soberania sira, maibé ita halo para hot-hotu partisipa iha Governasaun ida ne’e,”dehan Alkatiri iha Comite Central da FRETILIN Comoro, Dili, Domingu (10/09).

Alkatiri dehan, maske iha ona koligasaun, maibé FRETILIN sei loke nafatin odamatan ba Governasaun inkluzaun. “Ita kaer ukun maibé labele tau sira iha liur, maibé se sira lakohi, ita labele obriga. Ha’u halo nafatin esforsu atu labele taka odamatan ba negosiasaun ba inkluzaun. Kamarada sira bele dehan katak, se hatama ema barak, entaun ita-nia fatin menus ba bebeik,”relata Alkatiri.

Alkatiri haktuir, nia bele halo negosiasaun ho partidu seluk ba formasaun VII Governu, maibé sei la halo negosiasaun iha FRETILIN nia laran ba membru Governu. “Se ita hakarak Governu iha estabilidade, ita tenki hatene saida mak ita tenki halo. Maibé ita mós dehan, ema atu ba Governu tenki iha méritu, no ita mós dehan, Xefi Governu ida de’it, laiha rua no tolu, ita mós dehan, membru

Governu atu servi programa Governu nian, la’os programa partidu ida-idak nian. Tanba agora ne’e membru Governu mai husi ida, ema iha Ministériu ne’e nia laran hotu mai husi partidu ne’e rasik,”katak Alkatiri. Tanba ne’e, FRETILIN tenki dinamiza prosesu ida ne’e, liu husi implementasaun kultura polítika foun.

Tama VII Governu tenki aprezenta CV

Nune’e mós, Sekretáriu Jeral Partidu FRETILIN, Mari Alkatiri, hatete, se de’it mak atu involve iha sétimu Governu konstitusionál, tenki aprezenta Curriculum Vitae (CV), tanba Mari Alkatiri hakarak monta ema iha the right man on the right place. “Ha’u husu ba hot-hotu, maske ema FRETILIN ha’u hakarak CV. Se CV mai ha’u ladun fiar, ha’u tenki konfirma, maibé ida ne’e la signifika tenki ema S1, S2 no S3, maibé signifika ema sira ne’e halo saida ona to’o agora, tanba la’os S1, S2 no S3 de’it mak matenek,”katak Alkatiri ba jornalista sira iha Comite Central da FRETILIN, Comoro Dili,

Domingu (10/09). Mari Alkatiri haktuir, maske CCF deside ona atu nia mak assume kargu Primeiru Ministru, maibé nia rasik sei tetu desizaun ne’e. Tuir nia, maske membru CCF sira deside ona nia mak atu ba assume kargu Primeiru Ministru, maibé nia iha direitu atu foti desizaun konkorda ka lae. “Iha krize 2006 ne’e mós, membru CCF hotu dehan, tenki kontinua sai Primeiru Ministru, maibé loron tuir mai ha’u ba hasoru malu ho Prezidenti Repúblika hodi dehan, imi bele kastigu ha’u, maibé ha’u sei rezigna-an.

Depois liu tiha tinan lima, sira haree katak, desizaun ha’u halo ne’e mak diak liu,” katak Alkatiri. Sekjer FRETILIN ne’e dehan, FRETILIN la’os mesak de’it, maibé FRETILIN sei ukun hodi halo dezenvolvimentu ba povu iha Timor Leste tomak. Alkatiri mós garante FRETILIN sei ukun, no dezenvolvimentu sei mai iha Munisipiu hotu, maske la’os nia mak assume kargu Primeiru Ministru.

“Ha’u ko’alia hanesan ne’e, tanba ha’u hakarak tranzisaun jerasionál ne’e, ha’u hakarak atu hahú agora iha FRETILIN nia let, ida ne’e mak ha’u nia hakarak. Se la’e ha’u dehan, ha’u gosta tebes atu sai Primeiru Ministru, diak liu ha’u simu ona, tanba CCF 100% apoia ha’u, maibé ha’u hakarak FRETILIN fó ezemplu ba jerasaun foun atu kaer ukun, depois ami husi kotuk fó apoiu,”tenik nia. Alkatiri dehan, kuandu ko’alia tranzisaun jerasionál ne’e, labele ko’alia de’it, maibé tenki tau iha prátika.

“Se ha’u sai Primeiru Ministru ona, ha’u nia obrigasaun atu forma Governu. Maibé FRETILIN la ba ukun mesak, se FRETILIN ukun mesak, ha’u dehan Ministru 12 de’it to’o ona, maibé la ukun mesak ne’e, dalaruma ita toleransia oituan, Vise Primeiru Ministru bele iha no bele laiha,” katak Alkatiri.

Nia informa, Parlamentu Nasionál agora atu halo revizaun ba lei jestaun finanseira, atu halo orsamentu ida deit, husi fulan ida ne’e ba to’o Dezembru orsamentu retifikativu, no husi Janeiru ba oin, orsamentu tranzisaun. Ida ne’e atu fó tempu ba Governu foun ne’e, atu prepara projetu sira, no buat seluk tan atu implementa programa.

“Ha’u sai Primeiru Ministru karik, ha’u Primeiru Ministru ba Timor Leste tomak, ha’u la’os sai Primeiru Ministru ba Munisipiu 12, haluha fali Oe-cusse. ZEESM sei la’o nafatin ba oin, ha’u hanesan Primeiru Ministru, fó atensaun nafatin ba Oe-cusse,”katak Alkatiri

*gmntv.tl