Deputadu III lejislatura seidauk entrega kareta

Maske eis Prezidenti Parlamentu Nasionál (PN),  Aderito Hugo da Costa, hasai ona despaixu hodi haruka deputadu III lejislatura entrega fali kareta Prado ba Patrimoniu PN,  maibé to’o agora  maioria kareta hirak ne’e seidauk entrega, tamba deputadu barak la kontinua ona iha IV lejislatura.

Tuir observasaun GMN iha Parlamentu Nasionál nota katak, kareta barak mak sira-nia para fatin  mamuk, tanba eis deputadu III lejislatura seidauk entrega.

Kareta Prado ne’ebé sosa ba deputadu III lejislatura hamutuk 65, maibe to’o agora kareta balun mak foin hatama ba Patrimoniu PN, maibe maioria mak deputadu seidauk hatama.

Portavoz Parlamentu Nasionál, Lidia Norberta Dos Santos, hateten, kareta prado III lejislatura nian ne’e, agora dadauk iha hela faze diskusaun kona-ba prosesu alinasaun.

“Prosesu alinasaun kareta Prado Parlamentu Nasionál nian ne’e, agora dadaun iha faze diskusaun hela, hein atu hato’o iha plenária,” informa Lidia Norberta ba jornalista sira iha PN, Kinta (28/09).

Tanba ne’e, Lidia Norberta, dehan, nia seidauk bele esklarese kona-ba situasaun ne’e, tanba sei iha hela faze diskusaun entre Xefi bankada Parlamentar sira.

“Agora lider bankada sira reuniaun hela kona-ba kestaun ida ne’e, no nia desizaun ikus ne’e seidauk iha to’o agora,” relata nia.

Antes ne’e, deputadu IV lejislatura sira hatete, agora dadauk seidauk bele halo fiskalizasaun ba projetu Governu nian ne’ebé la’o iha teritóriu Timor laran tomak, tanba transporte laiha.

*gmntv.tl