Tenke Konsidera Laen

Atu evita violensia domestika (VD), iha familia uma laran, fen tenke konsidera laen, bainhira laen koalia feto tenke rona.

Tuir deputada Olinda  Guterres , husi bankada Khunto iha PN, hanesan mos membru komisaun G katak, violensia domestika akontese liu iha familia uma laran ninia, ida nee fila-fali ba sira ida-idak nian uma laran. Dala barak  mane mak tenke aas liu,  feto sempre okos hela deit, tanba nee maluk sira iha area rurais sira tenke rona malu.

Dala ruma  feto sira sai ba iha fatin ruma, la husu lisensa ba ninia kaben. Feto tenke hatene ida nee, liu-liu ba feto sira neebe kaben nain harii ona familia, labele mane mak sala deit, maibe feto mos tenke konsidera ninia kaben, siqnifika rona saida mak ninia kaben koalia.

Ita feto neebe kaben nain ka harii ona familia, bainhira atu sai tenke husu lisensa. Labele mane mak sala deit, maibe feto mos tenke konsidera ninia kaben, siqnifika rona saida mak ninia kaben koalia,” hatete deputada Olinda ba STL iha uma fukun PN, Kinta, (28/09/2017).

Nia hatete, dala ruma laen ba servisu fila fali mai husu dehan ohin ba neebe, no tama uma oras ida hanesan nee, ida nee mos bele hamosu lalais violensia domestika iha familia uma laran. Entaun oinsa mak forma ona familia, tenke hareee malu didiak. Atu nunee ema ida-idak bele evita kazu violensia domestika neebe mak too agora  sei mosu iha rai laran.

Ita hatene katak, agora dadaun lei ba feto sira makaas teb-tebes, tanba husi rede feto mos hareee problema ida nee ba oin. Hau nia mensajen mak nee, ba sira neebe mak forma ona familia, sira ida-idak tenke fiar no rona malu, tuir igreja nian haruka,”dehan nia.

Deputada nee akresenta, bainhira feto ida ho mane ida forma ona familia, tenke respeita malu no rona malu, atu nunee labele hamosu problema, liu-liu baku malu, tanba forma familia laos atu hamosu bebeik problema, maibe oinsa atu hadomi malu no koalia respeitu ba malu, maibe ida nee, depende ba ema ida-idak nian konsiensia.

*STL