Bankada 5 iha PN, Promete aprezenta proposta lei KAK

Bankada 5 iha Parlamentu Násional (PN) kompromete ona atu iha tempu badak aprenzenta proposta lei Komisaun Anti Korupsaun (KAK).  nian iha inisiu mandatu atu bele halo diskusaun. relata husi líder bankada sira, Kinta (21/09/2017).

“Ami sei haree tempu para iha tempu badak ami bele aprenzenta lei KAK nian, tanba korrupsaun hahalok ida ne’ebé prejudika ema nia moris,”  informa prezidente Bankada PD,  Maria Teresa Gusmão, ba jornalista iha PN, Sesta (22/9/2017).

Iha fatin hanesan, Vise prezidente Bankada PLP, Maria Angelina Sarmento, afirma, Lei KAK hanesan programa prioritariu ba PLP, tanba ne’e PLP sei aprezenta uluk projetu lei KAK hafoin halo aprovasaun ba orsamentu jeral estadu nian.

“Ami PLP sei sai proponente ida ne’ebé forte tebes, atu propoin lei anti korupsaun atu iha tempu badak bele sai hanesan lei dahuluk ne’ebé atu halo debate iha parlamentu násional,” afirma Maria Angelina Sarmanto.

Prezidenti Bankada KHUNTO, Luis Roberto hateten,  hanesan deputadu foun husi partidu foun ne’ebé foin hetan asentu iha PN hakarak tebes atu kontribui ba diskusaun lei anti korrupsaun.

“Ami bankada KHUNTO agora dadaun prepara hela  proposta ida konaba lei KAK nian para bele halo debate lalais iha meja parlamentu nian,” hateten Luis Roberto.

Iha sorin seluk, prezidente bankada CNRT, Arão Noe de Jesus mòs deklara, bankada CNRT ajenda ona projetu lei KAK atu halo diskusaun iha plenaria.

“ Ami ajenda ona, iha ajenda dahuluk CNRT sei fo prioridade ba Lei KAK nian ne’ebé seidauk hetan aprova, maibe ami sei haree fali projetu lei uluk ne’ebé ajusta, no Lei sira ne’ebé sei pendente ne’e ami foti fali hanesan projetu de lei,” hateten Deputadu Arão Noe.

Relasiona ho pendente lei KAK ne’e, prezidente Bankada Fretilin, Francisco  Miranda Branco esklarese, nia parte esforsu hela atu bele hetan koordenasaun hosi partidu haat seluk ne’ebé hetan asentu iha parlamentu.

“Ami agora dau-daun estabelese koordenasaun entre forsa polítika ne’ebé iha PN hodi avansa projetu lei KAK nian, no ami sei subskreve projetu lei ne’ebé kleur tebes iha PN,” hateten Francisco Branco.

Antes ne’e eis prezidente PN, Adérito Hugo deklara ona razaun kaduka lei KAK, tanba tempu limitadu, no III lejislatura okupadu ho lei rai ne’ebé sai preokupasaun mòs ba povu tomak.

*gmntv.tl