Opozisaun la garante programa VII Governu pasa iha PN

Partidu opozisaun iha Parlamentu Nasionál (PN) hatete sira la garante programa VII Governu nian atu pasa iha PN, tanba partidu polítika sira ne’ebé hetan asentu iha PN ne’e, ida-idak iha nia polítika rasik.

Deputadu Mericio Akara husi bankada PLP hateten, opozisaun la’os atu tongka Governu, maibé atu kritika saida mak la’o lalos.

“Programa Governu labele ami opozisaun mak garantia fali, atu garantia ne’e koligasaun. Opozisaun la’os hanesan aitongka fali ida ne’e, aitongka ne’e koligasaun ka PD mak bele tongka,” katak Mericio Akara.

Nia hatutan, bainhira Governu aprezenta nia programa ba Parlamentu Nasionál, PLP sei estuda didiak programa ne’e, tanba PLP sei mantein nia pozisaun hanesan opozisaun iha Parlamentu Nasionál.

Mericio Akara dehan, kna’ar opozisaun ne’e atu halo balansu no sai alternativu ba Governu, inklui mós halo kontrolu ba programa Governu nian.

“Kualker programa ka orsamentu ne’ebé mak Governu aprezenta, ami sei haree, ami sei diskuti no analiza programa husi Governu nian. Bainhira programa iha ami nia liman ona, ami foin estuda atu fó ami nia alternative,” tenik nia.

Tuir PLP nia hakarak ba programa ne’ebé mak importante atu Governu ne’e implementa mak, fó prioridade uluk ba infra-estrutura baziku, nesesidade baziku povu nian hanesan, saneamentu, estrada rural, uma ba povu, saúde no edukasaun, no dezenvolvimentu labele konsentra iha fatin ida, maibé tenki halo ba povu iha teritóriu Timor tomak.

*gmntv.tl