Somotxo: Ha´u bele lidera defeza seguransa

Ministru Defeza Seguransa José Agustinho   Sequira  `Somotxo`hateten, maske ema balu preokupa nia kapasidade lidera instituisaun refere, maibe nia parte fiar aan bele lidera instituisaun ne’e.

“Naran rua defeza no seguransa la´os naran foun  ba ha´u, ema barak  hanoin dehan ha´u labele, mas ha´u rasik senti dehan bele, ha´u bele tanba la´os foin  iha tinan 2017 mak ha´u liu husi situasaun  hanesan, durante 24 anos  liu situasaun sira  difisil liu ida  ne´e  dala sanulu mas konsege,“ deklara Defeza Seguransa José Agustinho   Sequira  `Somotxo`,  liu husi diskursu, Sesta (22/09/2017) iha salaun Delta Nova, Dili.

Somotxo haktuir, fiar ne’ebe mak nia asume ne’e sei lori too rohan.

“Konta  hotu ho imi sosiedade, matenek hotu, Organizasaun Não Govermentais (ONG)  hanesan Belun. Ha´u fiar katak, ha´u sei lori todan ida  ne´e to´o rohan,“ haklaken Somotxo.

Liu husi oportunidade ne’e nia parte agradese ba Polísia Australiana,   ne´ebé  iha tinan 2002, iha Timor-Leste nia sorin forma PNTL no F-FDTL, sai forza  ne´ebé  profesional no hatene nia kompetensia, ne´ebé konstituisaun rasik fó.

“Ba organizasaun hotu  ne´ebé mak preokupa defeza no seguransa ha´u agradese tanba ha´u fiar katak,  imi hamutuk ho ha´u imi ninia kontribuisaun ne´e aumenta  tan ha´u nia armazen  ne´ebé mak  iha ha´u nia kakutak laran hodi hamutuk asegura no  defende  ita nia nansaun ne´e,“ dehan Somotxo.

*gmntv.tl