Somotxo akuza Fidelis espiaun ba EUA, PLP ezije Governu lori kazu ne’e ba MP

Partidu Libertasaun Popular (PLP),  lamenta ho komentáriu Ministru Defeza no seguransa, José Agustinho Sequeira ‘Somotxo’ ne’ebé akuza Vise Prezidenti PLP, Fidelis Magalhães hanesan espiaun Estadu Unidu Amerika (EUA). Tanba ne’e, PLP ezije VII Governu konstitusional atu lori kazu ne’e ba Ministériu Públiku (MP) atu halo investigasaun klean hodi hatene se mak halo espiaun iha Timor Leste.

Vise Prezidenti PLP, Fidelis Magalhães, hateten, nia lamenta ho komentáriu hirak Somotxo nian ne’e,  ne’ebé  akuza eis Governante no deputadu balun husi bankada CNRT fa’an rai Timor Leste, nomós akuza nia hanesan espiaun EUA nian.

“Iha komentáriu ne’ebé Ministru Defeza halo, akuza ha’u nia pesoal hanesan espionajen ba Estadu Unidus Amerika. Iha ne’eba Ministru Defeza mós dehan katak, ha’u servisu atu asegura de’it interese Estadus Unidus nian,”katak Fidelis liu husi konferensia ba imprensa iha Hotel Timor Dili, Kuarta (29/11), hodi la konkorda ho deklarasaun MDS Somotxo nian ne’e.

Fidelis  lamenta ho estatementu Somotxo nian ne’e, liu-liu tanba  agora dadaun nia hala’o kna’ar hanesan deputadu ida, hanesan Vise Prezidenti Partidu Libertasaun Popular, hanesan Prezidenti bankada PLP nian iha Parlamentu Nasional, nomós hanesan Prezidenti Komisaun B ne’ebé tau matan ba asuntu Negosius Estranjeiru, Defeza no Seguransa.

“Ha’u senti akuzasaun ida ne’e sériu tebes. Ami sei haree kontestu legal, no kontestu akuzasaun ne’ebé mai husi Ministru Defeza, no ami husu atu iha responsabilizasaun husi parte Governu nian, no ami sei haree pasu ba oin. Ha’u lamenta tebes ho liafuan Ministru Somotxo nian ne’e, no ha’u husu ba parte Governu atu halo investigasaun lalais no lori kazu ne’e ba Ministériu Públiku,”katak Fidelis.

Fidelis dehan, nia jura ba konstituisaun RDTL atu defende de’it povu no nasaun Timor Leste nia interese. Fidelis hatutan, akuzasaun ne’e mai husi Ministru ida iha VII Governu konstitusional, ne’ebé hanesan mós ema luta nain ida.

“Akuzasaun ida ne’e tau em causa ha’u nia kredibilidade pesoal, no tau mós  kestaun ba kredibilidade PLP no Parlamentu Nasional rasik, inklui Estadu Timor Leste nian,” katak Fidelis. Tuir Fidelis, membru Governu ida halo akuzasaun ba membru orgaun soberania ida, hodi dun deputadu ida hanesan espiaun ba nasaun seluk ne’e ladiak.

“Nune’e ha’u husu no ezije lori ha’u nia naran no bankada PLP nia naran atu VII Governu ida ne’e halo lalais investigasaun no informa lalais ba Prokurador Jeral Repúblika, para bele investiga lolos, ha’u espiaun duni ka la’e ba nasaun Estadus Unidus Amerika nian. Ha’u mós husu atu SNI halo servisu ne’ebé diak liu kontra espionajen,”dehan Fidelis.

Fidelis konsidera akuzasaun Somotxo nian ne’e, ho objetivu atu hamate deputadu sira nia korazen no vontade polítika atu defende povu Timor Leste nian.

Fidelis mós orgullu tanba bele hetan oportunidade atu servisu hamutuk ho lideransa tuan sira, maibé lideransa tuan sira labele desakredita jerasaun foun sira nia kapasidade.

“Bainhira ami opiniaun hanesan, labele akuza ami mal-kriadu, bainhira ami nia opiniaun lahanesan, labele bolu ami mau-hu ka espiaun, bainhira ami opiniaun lahanesan, labele bolu ami inkapasidade, bainhira ami nia opiniaun lahanesan, labele bolu ami oportunista,”lamenta Fidelis.

Nia esklarese, ida ne’e oportunidade diak ba jerasaun tuan sira atu servisu hamutuk ho jerasaun tuan sira hodi hatudu dalan ida ne’ebé los, bazeia ba espíritu nasionalismu, klamar no mehi ba ukun rasik an nian, atu nune’e futurun nasaun nian bele sai metin liu tan ba oin.

Fidelis dehan, nia estuda iha Amerika maibé nunka estuda espionajen, maibé estuda materia  ne’ebé nasaun Timor-Leste presiza.

“Ami ezije atu bele iha investigasaun atu hatene lolos no klean, se los mak servisu ba rai seluk, sera que ha’u mak servisu iha interese ema seluk nian, ou dalaruma sira seluk ne’ebé subar hela aan,” katak Fidelis.

Nia haktuir, bainhira asume kna’ar públiku, Somotxo laiha direitu atu halo deklarasaun ida ho emosional hanesan ne’e, hodi haluha tiha nia responsabilizasaun hanesan membru Governu ida.]

Antes ne’e, iha entrevista ida iha Munisípiu Covalima foin lalais ne’e, Ministru Defeza no Seguransa, Agustinho Sequeira ‘Somotxo’ akuza Xefe bankada PLP, Fidelis Magalhães estuda iha Estadu Unidu Amerika hodi hasai kursu espionajen, no akuza mós deputadu CNRT balun fa’an Timor Leste, inklui eis Ministru balu.

@gmntv.tl