PR Lú-Olo sei Konvoka Diálogu Ikus ba Desizaun

Hafoin diálogu ne’ebé Prezidente Repúblika, Francisco Guterres ‘Lú-Olo’ promove ba dahuluk ‘falla’. Hakarak halo tan diálogu ba dala ikus nian hodi bele foti ona desizaun últimu.

Xefe Estadu halo ona diálogu ho lider antigu sira hanesan Xanana Gusmão no Taur Matan Ruak. Maibé, momentu ne’e Xanana la partisipa tanba halo viajen ba rai li'ur. Ne’e duni, la konsege hetan konsensu ruma husi diálogu ne’ebé halo antes ne’e.

“Dala ida tan diálogu maka laiha desizaun Prezidente Repúblika tenke foti desizaun tuir lei atu nune’e garante estabilidade nasionál”, dehan PR Lú-Olo, iha Kovalima-Suai, foin lalais ne’e.
Prezidente Repúblika nia desizaun ikus tenke tuir dalan lejítimu ne’ebé hatuur ona iha Konstituisaun.

Ukun Tenke Hetan Maioria

Entretantu, Forum Demokrátiku Nasionál (FDN) hato’o sira nia opiniaun Prezidente da Repúblika (PR) atu halo diálogu karik tenke envolve partidu polítiku hotu-hotu ne’ebé hetan asentu iha Parlamentu Nasionál.

“Diálogu tenke envolve mós partidu polítiku hotu ne'ebé reprezentasaun iha Parlamentu Nasionál. Hotu-hotu bele tuur hamutuk diskute para hetan dalan ida ba ita nia nasaun no povu”, dehan Portavós FDN, José Luis Guterres, iha Palásiu Prezidensiál, Bairru-Pité, horisehik.

Tanba ne’e, ho kestaun sira ne’e, FDN mós iha disponivel prontu atu fó kontribuisaun nafatin atu buka dalan oinsá buka solusaun hamutuk.

Tuir nia, mezmu bele iha diferente polítika, maibé tenke asegura nafatin pás no estabilidade ba povu tomak.

@independente.tl