Laiha Eleisaun Antesipada

Bankada sira iha parlamentu nasional, agora dadaun  domina husi opozisaun, nee  laos atu lao ba eleisaun antesipada.  Maibe tuir normal jeral,bainhira governu monu,  Prezidente Republika (PR) sei  bolu partidu segundu votadu atu forma governu.

Tuir Xefe Bankada CNRT, Arao Noe de Jesus, hanesan opozisaun atu asegura politika governu nian,  sei hare konteudu programa sira neebe iha.  CNRT mantein opozisaun tanba atu haree programa sira nee  tanba CNRT atu defende interese nasional.

“Haree ba opozisaun  barak domina iha komisaun, nee eleisaun antisipada seilaiha, tanba ita haree ba esperensia iha Portugal, governu monu, prezidente bolu kedas  partidu segundu mais  votadu mak bele forma governu, maibe segundu mais votadu mak labele mak  foin halai ba eleisaun antisipada. Ida nee tuir Sistema lao hanesan nee,” katak Arao ba STL Kinta foin lalais nee iha PN.

Enkuantu opozisaun domina lidera komisaun nee, sei lamosu eleisaun antisipada, maibe kabe ba Prezidente Republika nia kompetensia,  nia parte lakohi koalia adianta.

Nia akresenta, haree ba esperensia nasaun sira seluk neebe uza sistema semi-prezidensial hanesan Timor sistema lao hanesan nee, maibe importante mak tenke garante maioria parlamentar.

Nunee mos Xefi Bankada Fretilin Francisco Mirando Branco dehan, haree ba komisaun 7 neebe maioria lidera husi opozisaun, mezmu nunee Fretilin lidera iha komisaun ida deit, maibe garante no fiar  katak iha konsensia reprezentante povu nian.Tanba deputadu tuur iha PN nee hanesan  reprezentante povu, tanba nee fiar bainhira  programa governu nian diak,  proposta OJE ratifikativu  no ba oin programa diak  ba moris povu nian, ida nee konsensia deputadu hotu hanesan reprezentante povu nafatin garantia atu hadia moris povu ba oin.

Branco akresenta, agora ba oin Timor-Leste sei laiha partidu ida tan mak sei manan ho maioria absoluta, neebe agora dadaun nee hanesan ezersisiu ida ba Partidu Politika (Parpol) sira hotu atu servisu hamutuk. I realidade haree ba mensajem povu nian hakarak atu partidu hotu servisu hamutuk.

Nia hatutan Fretilin nuudar partidu mais votadu, ou manan maioria simples, neebe halo koligasaun ho PD hodi forma VII governu, tanba nee fiar katak programa governu fo benefisiu ba povu, deputadu sira iha PN sei fo votus afavor.

Informa Xefi bankada Fretilin Francisco Branco, katak koligasaun atu halo kooperasaun ho opozisaun nunee garante estabilidade governativa, ida nee sai nuudar materia substansial, tanba partidu hotu nia hakarak atu povu moris iha situasaun neebe hakmatek no dezenvolvidu.

“Ami hein hela, programa governu ho orsamentu jeral ratifikativu, neebe lakleur tan ami sei estabelese koordenasaun hodi lobi opozisaun nunee bele asegura programa governu ho projetu ba proposta, orsamentu ratifikativu neebe governu sei aprezenta mai,” tenik  Branco.

Xefi Bankada Fretilin nee, fiar katak kuandu koalia ba programa governu diak, povu barak sei haree no halo transmisaun direta, karik iha programa neebe diak ba povu,  deputadu sira hotu sei fo  fo votus afavor. Tanba nee sira iha hanoin pozitivu katak hotu-hotu hanoin atu halo nasaun nee diak.

Entretantu Xefi Bankada Khunto Luis Roberto da Silva hatete, Khunto nia pozisaun opozisaun, maibe politika atu asegura atu ba VII governu, nee mak nudar sidadaun Timor oan tenke buka iha unidade, kria paz,  amizade no estabilidade.

Haree ba programa politika neebe atu implementa ba iha povu relasiona ho programa neebe hatoo ona ba povu tomak iha kampana eleitoral.

“Ita koopera nafatin, maibe haree programa neebe lai, programa ba interese povu no nasaun khunto fo apou, maibe lafo vantajen ba povu no nasaun Khunto sei lakopera,”katak nia.

Entretantu Advogadu Privadu Paulo Remedios dehan labele halo elesaun antesipada,  tuir regra konstituisaun iha prazu atu halo eleisaun antisipada, bainhira parlamentu ida nee disolve tiha ona.

“Tuir regra konstituisaun iha prazu atu halo eleisaun antesipada, no halo elesaun antisipda parlamentu ida nee disolve no kansela parlamentu ida nee. Artigo 100 numeru 1 konstituisaun dehan katak, labele disolve parlamentu labele,iha antesipada durante fulan neen , tenke kontinua maioria ida nee, no konstituisaun iha limite.

Nia sublinhaeleisaun antesipada labele halo durante fulan neen, durante fulan neen labele halo eleisaun, governu labele monu, labele disolve mos parlamentu. Bele halo pedidu nomeasaun mas mantein nafatin hanesan governu temporariu.

Nunee iha fulan neen nia laran mak hamosu krize, sei mantein nafatin no labele halo eleisaun, regras iha tuir artigu sira tanba deputadu sira mak hakerek no aprova ona konstituisaun, tenke respeita regras, labele viola konstituisaun konforme kadeira neebe iha.

Camoes afirma, governu neebe simu pose iha mos 30 dias atu aprezenta programa governu nian ba parlamentu. Se la aprezenta tuir regra neebe iha, kuandu aprezenta programa pasa no aprovadu ona laiha kestaun,  se la arpovadu iha regra iha konstituisaun.            Atu rejeita programa governu tenke iha maoria absoluta, nee signifika sira tenke 55 % mais votu ida iha parlamentu.

Agora iha kadeira parlamentu laos votu eleitores. No regra seluk rejeita programa hamonu governu tenke rejeita dala rua, laos dala ida governu monu tuir regra konstituisaun neebe iha artigu 109, laos rejeita ida governu monu, se aprezenta dalarua parlamentu rejeita mak monu. Maibe governu monu kontinua iha fulan neen, no laiha elesaun antesipada.

Nia relata atu koalia konaba ba vmosaun sensura presiza hatene didiak iha neebe tanba vota sensura akontese iha razaun rua deit,  halo vota sensura konaba programa governu nian no  asuntu interese nasional. Maibe atu iha asuntu internasional tenke iha programa governu, no governu funsiona tiha ona prazu liu tiha 30 dias, bele iha kestaun konaba asuntu interese nasional fronteira maritima, akordu ho santa se, akordo ho Australia.Labele halo votu  sensura ba programa governu, bainhira governu seidauk aprezenta programa neebe iha tanba nee tenke hein durante 30 dias.

Iha fatin seluk, Akademika Fakuldade Direito UNTL Domingos Nunes dehan ema neebe tur ona iha kadeira reprezenta povu, tenke halo servisu ho diak tuir lei neebe iha hodi labele hamosu eleisaun antesipada.

“Povu nia hakarak nee atu moris iha hakmatek nia laran, tanba nee sei deit mak ukun ona tenke kria pas atu nunee labele hamosu tan elesaun antisipada, maske politika nia laran iha hanoin neebe la hanesan mas hotu hotu tenke tuir lei neebe iha, ”tenik Domingos. 

@STL