Ho ida ne’e nu’udar kompadre ba Xanana
Gusmão, Mari Alkatiri sei hein nia kompadre Xanana to’o iha Timor mak
sira na’in rua ko’alia ba malu.
“Karta nee segredu entre ha’u ho Xanana
Gusmão. Karta husi kompadre ida ba kompadre seluk entre ami na’in rua
mak hatene, ami rua sei ko’alia bainhira hasoru malu,” Primeiru Ministru
Dr. Mari Alkatiri informa ba jornalista sira iha selebrasaun natal
ksolok no tinan foun 2018 governu ho korpu diplomátiku sira, iha
Lauhata, Likisá, Kuarta (06/12).
Biar nune’e, Prezidente Bankada
Fretilín, Francisco Branco, antes ne’e dehan sai, karta ne’ebé mak
Xanana Gusmão hakerek ba Primeiru Ministru nia konteúdu mak primeiru,
Xanana hato’o ba nia kompadre katak bele ukun ba maibé husik nafatin
ministru finansas, ministru Obras Públika no Telekomunikasaun ho
Ministru Rekursu Minarais ba governante antigu alias eis membru governu V ho VI nian.
“Lahatene se maka hateten ida nee, maibé ne’e surat cinta
(karta amor) ne’ebé Prezidente Partidu CNRT Xanana Gusmao hakerek ba
Sekretáriu Jerál partidu Fretilín ami mós rona ida nee dehan ukun ba,
maibé tenke husik nafatin Ministru Finansas maka Santina Cardoso (Eis
Ministra Finansas), MOPTK (Ministru Obras Públika no Telekomunikasaun)
maka Gastão Sousa (Eis-Ministru) no Ministru Rekursu Minarais maka
Alfredo Pires (Eis Ministru),” Vise Prezidente Partidu Fretilín
Francisco Branco, informa ba STL, iha Parlamentu, Segunda (04/12/2017).
Maibé, Branco haree katak tanba Fretilín
la tuir ezijénsia hosi Xanana Gusmão mak ikus mai iha Parlamentu
Nasionál opozisaun sira hamosu Bloku ne’ebé Aliansa Maioria Parlamentár
(AMP) no realidade hatudu AMP konsege halo rejeisaun ba programa governu
bainhira Primeiru Ministru aprezenta iha Parlamentu Nasionál.
Iha parte seluk Sekretáriu Jerál CNRT,
Francisco Kalbuady konsidera informasaun ne’ebé espalladu katak
Prezidente CNRT, Kay Rala Xanana Gusmão husu kargu tolu ba Primeiru
Ministru ne’e la los.
Laloos mós, bainhira Fretilín konsidera,
tanba Fretilín la responde karta Prezidente CNRT mak ikus mai hamosu
AMP iha Parlamentu Nasionál.
“Ami husu la konsege mai. Maibé maun
Xanana atu ba asina akordu rai li’ur (momentu ne’ebá) entaun nia hakerek
duni karta ida ba Dr. Mari Alkatiri nu’udar nia irmaun no karta ne’e
dirije ba hanesan pesoál no maun boot husu duni postu hira maibé la’ós
ba CNRT nia kuadru no ba de’it iha sira ne’ebé durante tinan barak iha V
no VI governu katak iha tékniku na’in hira mak merese bele kontribui ba
boa governasaun iha futuru,” Kalbuady konta tuir.
Hodi fó hanoin katak uluk CNRT ho
Fretilín halo negosiasaun ida kapás tebes bainhira atu forma governu,
iha tempu ne’ebá Fretilín husu ba CNRT atu partisipa mezmu iha opozisaun
maibé bele apoiú hanesan insidénsia iha Parlamentu.
Tanba ida ne’e, ikus mai CNRT husu ba
Fretilín se bele haruka karta ofisiál ida ba CNRT atu CNRT haree saida
mak CNRT bele kontribui konstrutivu iha governasaun ne’e. maibé antes
Fretilín fó karta tanba Xanana nu’udar Prezidente Partidu CNRT sei halo
viajen ba Kopenhagen hodi atende kazu fronteira Marítima nian iha loron
22 Agostu nune’e iha loron 20 Xanana manda karta ida ba aktual Primeiru
Ministru (momentu ne’e nu’udar sekretáriu jerál Fretilín) iha loron 20
Agostu, ne’ebé ikus mai dehan husu kargu ne’e.
Maibé, tuir loloos iha karta ne’e tuir Kalbuady nia entendimentu, Xanana so hato’o proposta de’it.
“Asuntu proposta, se karik simu di’ak
liu no lakohi mós la iha obrigasaun maibé karik bele tékniku sira
didi’ak bele simu ba hodi partisipa iha VII Governu,” Kalbuady konta
tuir konteúdu balun hosi karta Xanana nian ba nia kompadre Dr. Mari
Alkatiri.
“Mosu AMP ne’e labele fó kulpa ba ema
ida maibé oinsá mak bele armonia situasaun ne’e ho responsabilidade ho
sentidu estadu atu ema hotu bele hakmatek.”
@tatoli.tl
No comments:
Post a Comment