FRETILIN hahú prepara-an ba EA ”AMP nunka hakfodak”

Adjuntu Sekretáriu Jeral Partidu FRETILIN, José Reis, informa, liu husi enkontru alargada ba estrutura hotu iha FRETILIN nia laran atu hahú prepara-an ba hasoru Eleisaun Antesipada (EA).

“Ho reuniaun ida ne’e  ezije mós tenke ho dalan konstituisaun nian katak husi partidu mós tenta prepara-an atu bele hasoru situasaun ida ne’e,  tanba ne’e maka ami kontinua fo instrusoens ba iha estrutura sira sub-nasionais para kontinua halo kontaktus no organiza estrutura tomak ho militante no sidadaun hotu atu bele halo diseminasaun no divulgasaun kona-ba programa ne’ebé maka VII governu konstitusional foin lalais aprezenta,”haktuir adjuntu Sekretariu Jeral Partidu FRETILIN ba jornalista sira iha Comíte Central Fretilin Comoro, Sábadu (02/12/2017), hafoin halo reuniaun alargada entre estrutura partidu no organizasaun hotu ne’ebé mak iha partidu FRETILIN nia okos.

José Reis afirma, estrutura FRETILIN metin nanis ona iha baze, tanba ne’e liu husi enkontru ne’e  atu reforsa tan de’it servisu iha baze.

“La’os de’it agora atu eleisaun antesipada mak prepara, maibe partidu FRETILIN iha estrutura to’o iha kraik, ne’ebé loron babain mós servisu, no sempre halo nafatin enkontru iha kraik, maibe ho situasaun ida ne’e konserteza ami alerta nafatin ba iha estrutura sub-nasionais atu bele kontinua halo servisu, atu halo diseminasaun no halo kontaktu ba militante sira ho informasaun no ba populasaun tomak,”esplika José Reis.

José Reis dehan, iha tempu badak, FRETILIN ho Partidu demokratiku (PD) sei halo akordu eleitoral hodi hasoru Eleisaun Antesipada.

“Ami klaru ona no pozisaun PD mós klaru, ba oin sei iha akordu eleitoral ida ho PD, oinsa mak atu la’o ba oin, maibe so iha akordu eleitoral, laiha koligasaun se lae bele kria problema bo’ot,”haktuir José Reis.

Líder FRETILIN ne’e mós husu ba povu hotu inklui partidu polítiku hotu atu mantein garante estabilidade nasionál hasoru situasaun hotu.

“Atu garante estabilidade  ba oin ne’e la’os de’it FRETILIN de’it, maibe partidu tomak no povu hotu atu bele kontribui ba paz no estabilidade ida ne’e, tanba ita labele la’o ba kotuk,”hateten José Reis.

Iha fatin hanesan, Koordenador FRETILIN Munisípiu Baucau Postu Quelicai, Mateus Cabral, garante, partidu FRETILIN sei manan absoluta iha eleisaun antesipada.

Mateus Cabral mós sei servisu maka’as, atu halo kontaktu eleitoral ba povu hotu iha baze atu vota ba FRETILIN.

“Mosu Eleisaun Antesipada, ami baze prontu vota nafatin ba FRETILIN, no partidu seluk tun karik, ami mós sei organiza ba povu atu labele vota partidu seluk,”Mateus garante.

Antes ne’e, Bloku Opozisaun Aliansa Maioria Parlamentar (AMP) kompostu husi CNRT, PLP no KHUNTO mós hato’o ona sira-nia prontidaun atu simu kualker desizaun saida deit mak Prezidente Repúblika, Francisco Guterres ‘Lu-Olo’ sei hasai, tamba sira nunka hakfodak.

@gmntv.tl