Estadu tenki seriu hola pozisaun ba kazu Tiago Guerra ho Chan Fong Fong

Organizasaun Naun Govermental Judicial System Monotoring Programe (JSMP) husu ba Estadu Timor-Leste tenki seriu hola pozisaun ba informasaun ne’ebe deskunfia embaxada Portugal fasilita passaporte ba arguidu Tiago Guerra ho nia kaben Chan Fong Fong Guerra, hodi halai ses husi justisa Timor-Leste.

Iha parte seluk, Governu mos tenki halo investigsaun ba embaxada Portugal, hodi bele hatene sira mak fasilita duni ka lae.

“Kuandu los duni, Estadu Timor-Leste tenki hola desizaun hodi fo sansaun ka haruka fila embaxador ne’ebe responsabilidade, tanba situasaun ne’e ita labele permiti,’’ dehan Diretor ezekutivu JSMP Luis Oliveira de Sampaio ba jornalista sira iha JSMP Colmera, Kuarta (29/11).

Luis afirma Ministeriu Negosiu Estrangeriu tenki hola medidas lalais ba problema ne’e, hodi bele hetan nia resultadu, tanba situasaun ne’e halo ema la fiar ona kapasidade, kualidade no kredibilidade justisa iha Timor-Leste.

Tuir nia, lolos Estadu Timor-Leste aprende ona esperensia antes ne’ebe Emilia Pires mos halai ses tiha husi nia responsabilidade krime, tanba ne’e mos Governu bele hare situasaun ne’e hanesan kazu  urujensia para hare ba oin pasu saída presija halo ou bele mos elabora no kontaktu atu defini deksute akordu estradisaun para bele evita ona kazu sira hanesan ne’e.

 “Agora atu lori sira fila todan ituan, maibe  lasignifka la bele, maibe dalan ba ne’eba sei naruk, dala ruma defisil tanba Emilia deit ita to’o agora seidauk iha esforsu ruma, maske desizaun rekursu sai ona mos susar atu lori sira fila, tanba sira iha nasaun seluk ita nia juridisaun ketak ona, susar atu kaer sira tanba serteza Portugal proteje ona sira nia sidadaun,’’ esplika Luis.

 Arguidu nain rua ne’e, Tribunal Distrital Dili kondena pena prizaun tinan 8 no selu indeminizasaun U$ 859.706 ba krime pekulatu iha loron 24 fulan Augusto 2017.

Maibe iha iha loron 9 fulan Novembru, kasal Portugues nain rua ne’e halai sai liu husi tasi Betano, municipiu Manufahi to’o ba iha Darwin-Australia.

Tuir informasaun husi Lusa, hafoin arguidu nain rua ne’e to’o iha Darwin, polisia Australia kaptura kedas sira, tanba la iha vistu.

Maibe iha loron 25 fulan Novembru ne’e, informasaun husi Lusa fo sai tan katak, arguidu sira to’o ona iha Portugal ne’ebe simu husi sira nia familia.

@gmntv.tl