Teste ne’e relasiona ho fenómenu
manu-tolun falsu ne’ebé sirkula iha merkadu nasionál durante
fulan-agostu 2017, AIFAESA foti medida hodi inspesiona no fiskaliza
estabelesimentu sira iha Dili, liuliu importadór no distribuidór hanesan
Lucky Market, W-Four, Lita Cool no Loja Yang nomós manu-tolun lokál
husi Rai-Lako (Ermera) no Loes hodi foti amostra no submete ba
Laboratóriu Diagnóstiku Veterinária, MAP, mak rezultadu fó sai katak nia
kualidade tun maibé laiha manu-tolun falsu ne’ebé komersializa iha
Timor-Leste.
Diretór Departamentu Planeamentu
Operasionál Risku Alimentár no Laboratóriu, Ângelo Edmundo Belo, informa
aleinde kualidade manu-tolun, halo mós análize ba kontaminante,
espesifikamente ba mikróbiu hanesan Total Plate Count no E.coli,
no nia fin hatudu manu-tolun livre husi kontaminasaun ka substánsia
perigoza sira, nune’e manu-tolun bele konsomu no sei la fó impaktu ba
ema nia saúde.
“Laiha manu-tolun ne’ebé falsifikadu ka
danifikadu ne’ebé komersializa iha ita-nia nasaun. Kualidade manu-tolun
ba kategoria ikus liu signifika nia kualidade tun. Fatór prinsipál sira
ne’ebé influénsia ba kualidade ne’e rasik tanba kondisaun fatin ne’ebé
konserva manu-tolun la adekuada ho tempu ne’ebé naruk no kadeia
komersializasaun ne’ebé naruk, tan ne’e implika ba kualidade”, Ângelo
hatete liuhusi konferénsia impresa iha Matadouru, ohin.
Maski nune’e bainhira han la implika ba
ema nia saúde maibé presiza konserva ho di’ak hodi mantein nia kualidade
atubele oferese nutrisaun ne’ebé di’ak.
Koordenadór AIFAESA, Abílio Oliveira
Sereno, hatutan relativamente ho konservasaun manu-tolun nian,
espesífikamente ba ijiene, AIFAESA seidauk iha lejislasaun tanba ne’e
sei iha difikuldade ba ida ne’e mezmu kona-ba rótulu (label) hakerek
halo di’ak para konsumidór sira bainhira bá sosa tenke haree no ladi’ak
labele sosa maibé daudaun ne’e seidauk iha regulamentu.
“Kona-ba lejislasaun ne’e prioridade
ami-nian, kuandu ita-nia governasaun la’o loos ona prioridade primeiru
mak alterasaun dekretu lei ne’ebé fó infrasaun ba konsumidór ne’e ami
prepara hotu ona, draft iha hotu ona hein submete ba Konsellu Ministu
hodi diskute para hatama inkompletu no lakuna sira iha lejislasaun
ne’ebé agora iha”.
“Buat barak ami bá haree labele halo
buat ida tanba seidauk tama iha lejislasaun. Ita bá halo protesaun saúde
ida, ita tenke esplika nia ladi’ak tuir lei no artigu saida para fó
sansaun. Haree de’it ne’e la’e, ida ne’e iha ona ami-nia prioridade para
tama iha projetu alterasaun”.
@tatoli.tl
No comments:
Post a Comment