Alkatiri: La lójika komandu da luta iha liur haruka ordem mai rai laran

Primeiru Ministru(PM) Mari Alkatiri deklara, ohin loron Timor-Leste(TL) Nasaun independenti ne’ebé iha Prezidenti Repúblika, Governu, Parlamentu no Tribunal Rekursu, tanba ne’e la lójika bainhira komandu da luta iha rai liur haruka ordem mai rai laran.

Alkatiri hato’o asuntu ne’e, hafoin informa servisu Governu nian durante semana ida ne’e ba Prezidenti Repúblika Francisco Guterres Lú Olo, iha Palacio Prezidensial Nicolau Lobato Dili, Kinta-feira (23/11/2017).

“Uluk ami iha liur 24 anos ami sempre dehan komando da luta sempre iha rai laran, kuandu tenta atu tau lideransa masimu iha liur, ami dehan labele. Agora ita indepedenti ona, ita iha PR, PN, Governu, Tribunal Rekursu, komandu da luta ba fali iha rai liur, hodi haruka ordem mai, ne’e laiha lojika,”Alkatiri hateten.

Alkatri sujere katak, dalan di’ak liu atu solusiona tensaun politika iha rai laran mak lideransa hotu tenki mai hamutuk  iha Timor konta ho mediasaun Prezidente da Republika nian.

“Fortifika husi ne’ebe, sira mak 35 votus nafatin ne’e, governu ne’e iha apoiu husi sosiedade sivil no entidades hotu,”reafirma Alkatiri.

Entretantu, foin lalais ne’e Prezidente Partidu Libertasaun Popular (PLP) Taur Matan Ruak, Konseleiru Superior Partidu KHUNTO Jose dos Santos Naimori hasoru malu ho Prezidente Partidu CNRT Kay Rala Xanana Gusmão iha Singapura hodi hametin liu tan ezistensia Aliansa Maioria Parlamentar(AMP).

@gmntv.tl