Taur: Partidu Hotu Mosu Atu Ukun

“Partidu hotu mosu atu ukun, se partidU ida mosu la hanoin ukun ne’e bosok, tanba saida ita iha hanoin, tanba ita iha vizaun iha programa atu kontribui ba dezenvolvimentu nasaun nian”.

Prezidente PLP Taur Matan Ruak hato lia hirak ne’e, iha konferensia nasional PLP nian ne’ebe halo iha Hotel Novu Turismo, Dili, Sabadu (11/11/2017).

“Hanoin atu ukun ne’e mak ita harii partidu, ida iha eleisaun nia manan maioria nia ukun mesak, ida seluk manan la maioria tenke halo koligasaun nune’e bele ukun hodi lori nasaun ne’e ba oin. Tanba ne’e eleisaun ne’ebe foin dadaun liu laiha partidu ida mak manan maioria nune’e partidu 5 ne’ebe hetan asentu iha Parlamentu tenke halo servisu makas nune’e bele hetan solusaun ba ukun,” dehan Taur.

Lideransa PLP ne’e hatutan, kuandu partidu ne’ebe ba ukun laiha Maioria Parlamentar mak sei hetan risku bo’ot ba nia governasaun mak orsamentu no Programa sei la passa iha Parlamentu Nasional (PN) mak governu sei monu no hamosu governu foun.

Eis prezidenti republika period 2012-2017 ne’e eslika katak, sira nia partidu ses hosi VII Governu ne’ebe lidera hosi PM Mari Alkatiri tamba iha negosisaun, Partidu FRETILIN hakarak okupa fatin soberania hotu, maski PLP koalia ona katak partidu ne’ebe nia lidera prontu kaer meja parlamentu nasional.

“Durante ne’e, bainhira dialogu koalia kona ba pozisaun kona ba meza PN hau hatete ba Mari, PLP nia pozisaun iha meza PN labele ema FRETILIN, maibe ami apoiu Mari ba Primeiru Ministru no fatin bo’ot sira ne’e imi nian hotu, maibe ki’ik sira ne’e fo mai ami, tanba ami partidu ki’ik foun hakarak atu aprende,” esplika Taur hodi esklarese saida mak uluk akontese iha negosisaun ba formasaun VII Governu.

Karik mak FRETILIN manan maioria ho kadeira 33, entaun pozisaun PLP nonok no sei tuir saida deit mak FRETILIN orienta.

@thetimor-news.com