Naimori: Ita Labele Husik Maun Xanana no Maun Taur Lao Mesak

“Imi PLP tenke orgullu tanba bele hamutuk ho lider masimu ida hanesan maun Taur Matan Ruak, tanba nia uluk hamutuk ho ita ikus hakarak hamutuk nafatin ho ita, ne’e duni ita labele husik maun nain rua hanesan, maun Xanana hanesan ita nia aman no maun Taur atu lao mesak no labele husik sira atu ema hamnasa sira tenke lao tuir nafatin sira nia kotuk”.

Konselleru Superior Partidu KHUNTO, Jose Naimori hato’o lia hirak ne’e ba kuadru no estrutura PLP nian iha konferensia nasional ne’ebe halo iha Hotel Novu Turismo, Sabadu (11/11/2017).

“Hau nia apela ba militante hotu PLP nian keta husik ita nia maun, lao nafatin ho ita nia maun hodi aprende tan buat barak husi nia atu nune’e aban bai rua PLP bele sai buras nafatin ba oin,” dehan Naimori.

Nia afirma, dala barak ema sempre dehan KHUNTO laiha lideransa, maibe KHUNTO hakarak dehan Timor ida deit.

“KHUNTO lideransa laiha, dala barak ema sempre koalia ami hatete at ami, maibe ami so hamnasa deit hodi dehan laos tauk maibe hakarak manan hodi hamutuk lori nasaun ne’e ba oin,” dehan Naimori.

Iha eleisaun parlamentar, Partidu KHUNTO hetan kadeira 5 no hamutuk ho Partidu CNRT ho PLP hodi sai forsa politika maioria iha Parlamentu Nasional.

@thetimor-news.com