PN Sei Diskute Orsamentu Retifikativu iha Inísiu Dezembru

Prezidente Parlamentu Nasionál (PN), Aniceto Guterres, hateten PN sei diskute proposta Orsamentu Retifikativu iha inísiu dezembru 2017 tanba komisaun C sei halo apresiasaun ba proposta ne’ebé aprejenta.

ʺOhin komisaun C halo reuniaun hodi halo pareser ida  mai ha’u kona-ba karáter ne’ebé governu hato’oʺ, informa nia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin.

Tuir oráriu, ohin mós líder bankada sira sei halo konferénsia hodi diskute ajenda diskusaun. Parlamentu sei diskute no halo deliberasaun ba proposta lei tuir pareser komisaun C.

ʺGovernu husu karáter urjénsia ba proposta lei orsamentu retifikativu tanba ne’e maka ohin komisaun reuniaun hodi halo pareser ida ba parlamentu atu halo deliberasaun iha ka la’e karáter urjénsiaʺ, tenik.

Prezidente PN hatutan plenária sei foti desizaun ba pareser komisaun C ne’e iha tempu badak hodi ajenda ona diskusaun ba proposta orsamentu retifikativu.

ʺHa’u bele preve hela, primeira semana dezembru nian maka sei akontese debate ne’eʺ, katak tan.

Aniceto Guterres hatutan desizaun sei depende ba rezultadu konferénsia líder bankada iha Parlamentu Nasionál.

@tatoli.tl