Lere Fiar Líder Istóriku Sira Hetan Konsensu

Líder rezisténsia, atuál Xefe Estadu Maior FALINTIL-FDTL, Majór Jenerál Lere Anan Timur, fiar líder sira sei hetan konsensu hodi hakotu tensaun polítika ne’ebé la’o dadaun.

ʺUluk iha funu ha’u iha esperansa, iha fiar ba sira atu lori nasaun ne’e ba oin, tanba sira líder rezisténsia hanesan maun Xanana Gusmão, Marí Alkatiri, José Ramos Horta, Abilio Araújo no Taur Matan Ruakʺ, dehan Lere ba jornalista sira iha Palásiu Prezidensiál Nicolau Lobato Bairo Pité, ohin.

Ohin, Prezidente Repúblika, Francisco Guterres Lú Olo, hala’o diálogu ho líder istóriku sira hanesan Marí Bin Amude Alkatiri no Taur Matan Ruak iha Palásiu Prezidensiál hodi hetan konsensu, nune’e rezolve tensaun polítika ne’ebé mosu durante formasaun governu.

Tuir Lere, presiza nafatin líder antigu sira atu ukun nasaun ne’e. ʺUkun ne’e imi nian, no jerasaun foun sira lalika mehi lai tanba katuas sira sei moris, ukun ne’e la’os fásilʺ, katak.

Entretantu, Prezidente Parlamentu Nasionál, Aniceto Guterres, hateten diálogu ne’e presiza tebes prezensa hosi líder nasionál, Xanana Gusmão atu bele hetan konsensu.

ʺMaun boot Xanana Gusmão hanesan Prezidente CNRT, to’o oras ne’e laiha serteza maske diálogu ne’e marka iha 15 bainhira maka fila husi rai liurʺ, tenik.

@tatoli.tl