"Iha análize ikus povu maka tenki desidi fali. Maibé ha'u hanoin katak sei laiha indesizaun hafoin ne'e", Mari Alkatiri hatete iha entrevista ba Lusa iha Perth.
"Povu iha konsiénsia katak [iha eleisaun lejislativu loron 22 Jullu] fahe ona nia votasaun hodi buka estabilidade no kria ona instabilidade no tanba ne'e tenki konsentra liután sira nia votu iha partidu ne'ebé sira hanoin di'ak liu hodi governa nasaun", nia konsidera.
Afirma mós katak iha posibilidade "hetan solusaun ida iha kontestu hosi Governu dahitu nia laran", Alkatiri konsidera katak líder polítiku tomak tenki hanoin "loloos" kona-ba saida maka sira halo daudaun iha atual momentu polítiku.
"Brinkadeira sira tomak ne'ebé maka halo dauadun hanesan ladún di'ak. Ha'u hanesan ema optimista, tuir natureza, no ha'u hanoin katak ami sei ultrapasa situasaun", nia konsidera.
Mari Alkatiri ko'alia ba Lusa iha Perth bainhira partisipa, entre loron-sesta no loron-domingu, iha Asia Pacific Regional Conference ne'ebé nia abertura ofisial sei hetan intervensaun hosi Alkatiri no hosi nia homólogu australianu, Malcolm Turnbull, no hosi prezidente alemaun Frank-Walter Steinmeier.
Durante vizita, Alkatiri sei halo mós enkontru bilateral sira ho prezidente alemaun, ho primeiru-ministru no ministru Finansa australianu, ho ministru Negósiu Estranjeiru Singapura nian no ho prezidente sira hosi Woodside Petroleum e da Conoco Philips, no seluk tan.
Hahú eleisaun loron 22 Jullu maka Timor-Leste hasoru hela momentu intensu ida tensaun polítika nian ho Fretilin lidera Governu minoritáriu ida - iha koligasaun ho Partidu Demokrátiku - ne'ebé kontrola de'it fatin 30 hosi fatin 65 iha Parlamentu.
Opozisaun maioritáriu - forma hosi Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) - ne'ebé fó sai ona kriasaun hosi Aliansa Maioria Parlamentar (AMP) ida hanesan alternativu ba Governu.
Iha fulan liubá sira aprezenta ona proposta rejeisaun ida hasoru programa Governu nian ne'ebé agora daudaun prepara hela dokumentu foun ida ne'ebé hakarak aprezenta ba parlamentu hamutuk ho Orsamentu Retifikativu "to'o tinan nia rohan".
Bainhira programa ne'e hetan fali xumbu, Governu sei monu no Prezidente Repúblika tenki hili entre buka solusaun governativu foun ida iha senáriu parlamentar atual ka avansa ba eleisaun antesipadu.
Alkatiri insisti katak "tuir konstituisaun ho tuir dalan legal, AMP la ezisti" tanba, nia hatutan katak "koligasaun polítiku-partidáriu ruma envolve lideransa polítiku-partidáriu sira" no, iha kazu hosi CNRT, partisipasaun hosi koligasaun ne'e implika "fila ba nia Konferénsia Nasional hodi halo desizaun ida la hanesan desizaun ne'ebé halo ona" hafoin eleisaun.
"AMP ne'e la ezisti. No, tanba ne'e, bainhira sira diriji ba Prezidente Repúblika deputadu na'in 35 asina. (...) Xanana Gusmão [prezidente CNRT nian] iha estranjeiru no Taur Matan Ruak [prezidente PLP nian] maski iha Timor-Leste maibé la asina buat ida, tanba ne'e koligasaun la ezisti", nia afirma.
"No maski ezisti, Prezidente Repúblika laiha obrigasaun atu konvida partidu daruak ne'ebé hetan liu votu hodi harii Governu", nia hatutan mós.
Hatán kona-ba pozisaun hosi Xanana Gusmão iha senáriu atual - líder istóriku timoroan nian kleur ona maka iha hela estranjeiru no halo deklarasaun sira ne'ebé la klarifika nia postura total - Alkatiri admiti katak nia pozisaun sei hanesan "desizivu".
"Ema sira ne'ebé hatete katak ha'u bosok bainhira hatete katak Xanana Gusmão garanti ona viabilizasaun hosi Governu Fretilin nian bainhira iha koligasaun ida ne'ebé aumenta númeru hosi kadeira sira to'o pelumenus fatin 30. No nia promete ona. No la'ós de'it ba ha'u. Nia hatete iha enkontru ida entre ami na'in tolu ho Prezidente Repúblika no iha enkontru ikus entre partidu rua", nia afirma.
"Ikusmai sira hatete katak nia nega. Ha'u la fiar ida. Ne'e hanesan sira nia invensaun iha parlamentu. Tansá maka to'o agora, sira seidauk tau deklarasaun vídeo ida Xanana nian hodi nega ne'e?", nia konsidera hodi admiti katak seidauk hatene "loloos saida maka Xanana sei halo iha futuru".
@LUSA TL
No comments:
Post a Comment