“AMP lamenta profundamente no kondena makaas ba deklarasaun husi Ministru Defeza no Siguransa, ne’ebé falta de sensibilidade publika no la kontribui ba hametin paz no estabilidade iha ita nia rain, ne’ebé bele provoka asaun hirak ne’ebé bele perturba ordem publiku no disiplina sosial, no utiliza Forsas Armadas no Forsas Siguransa para interese ekskluisivamente Partidariu,” deklara deputada Albina Marcal liu husi Konferensia Imprensa ne’ebe mak halo iha salaun bankada CNTRT iha PN, Sesta (24/11/2017).
Deputada ne’e konsidera katak statement Ministru Somotxo kontra ona konstituisaun RDTL kona ba atu assegura orden publiku.
“Ho deklarasaun ne’e MDS hatudu momoos
nia inkapasidade hodi ezerse nia kargu nudar Membru Governu ho
responsabilidade tuir artigu 22.°, n.° 2, alínea n), o), no alinea p),
husi Orgánika VII Governu Konstitusional, aprovado liu husi Decreto-Lei
n.°35/2017, de 21 de Novembro. Decreto Lei n.°35/2017 ida ne’e atribui
ba MDS kompetensia hodi garante no mantein nafatin orden no
trankuilidade públika no hodi asegura protesaun ba liberdade, nomós ba
Siguransa ema nian no sira nia bens, hodi prevene no fo sansaun ka
kastigu ba hahalok krimi sira,” dehan Deputada Albina.
Nune’e, sira husu karik, Ministru
Somotxo laiha kondisaun atu kontinua nia knar hanesan Ministru bele husu
demisaun no bainhira Ministru la halo demisaun mak AMP sei husu ba PR
Francisco Guterres Lu-Olo atu demiti bazeia ba rekerimentu husi Primeiru
Ministro tuir konstituisaun RDTL artigu 86 alinea H.
Iha 22 Novembru 2017, hafoin audiénsia
ho Presidente da Repúblika (PR) MDS, Ministru Defeza no Seguransa
Sequeira Somotxo, haklaken nia pozisaun kona-ba responsabilidade husi
Forsas Armadas no forsa sira kona-ba oinsa garante paz no estabilidade
iha ita nia Rai katak, kuandu problema ruma iha Timor nee, nem soldadu
ida sai, nem policia ida sai, hotu-hotu iha kuartel. Provokasaun nee
hosi deputadu sira, Mais problema ruma, kuandu mosu, nee ohin hau hatete
ne’e, nem militar ida, nem PNTL ida sai. Neebé entrega tomak ba sira
deputadu 35 atu rezolve.
Iha sorin seluk Xefe bankada FRETILIN
Francisco Miranda Branco hatete, lolos deklarasaun ne’ebe mak fo sai
husi MDS hanesan preokupasaun ida ne’ebe ba manutensaun viaturas sira
ne’ebe mak sirania orsamentu la premite liu husi alokasaun ne’ebe haruka
ba sira.
“Preokupasaun ne’ebe mak MDS halo ne’e
tanba preokupadu ho emosional uitoan, ne’e duni ita mak tenke kompriende
tanba hanesan kargu ne’ebe nia tutela se iha kondisaun hanesan ne’e nia
sente responsabilidade ida ne’ebe todan tanba situasaun ne’ebe presiza
intervensaun husi Forsa defeza no seguransa maibe kondisaun ba sira
hanesan kareta sira tenke presiza konvustivel atu nune’e bele halo
servisu,” dehan deputadu Francisco Branco.
Nia haktuir, durante ne’e iha
informasaun hato’o husi parte defeza Seguransa laiha ona kondisaun
hanesan konvustivel menus ona iha instituisaun refere. Tanba ne’e hodi
mosu emosional husi Ministro Agustinho Somotxo.
“Husi parte ami nian bele interpreta
katak, hanesan autoridade ida ne’ebe tutela ba area rua ne’ebe iha
responsabilidade hodi halo manutensaun ba estabilidade no seguransa
Timor – Leste nian iha kondisaun ida ne’ebe laiha rekursus entaun nia
sente preokupadu,” dehan Xefe bankada FRETILIN ne’e.
Iha parte seluk, deputadu bankada PD,
Luis Ribeiro afirma, sira nia parte konsidera deklarasaun ne’ebe mak MDS
halo dalaruamsira sukat rekursu ne’ebe iha instituisaun ne’e la
sufisiente.
“Rekursu iha Instituisaun ne’e dalaruma
la sufisiente mak ministru hodi hasai deklarasaun nune’e, maibe laos
dehan atu akontese nune’e duni, ida ne’e hanesan motive atu provoka ita
nudar politiku ne’e, tenke halo politika refleta ba situasaun povu no
estadu ninian,” dehan deputadu Luis.
Tuir nia, makina estadu atu funsiona
normal tenke iha rekursu ne’ebe diak. Tanba iha instituisaun ne’e makina
ladun funsiona diak mak sai hanesan razaun ba deklarasaun refere.
@thetimor-news.com
No comments:
Post a Comment