Autoridade Inspesaun no Fiskalizasaun ba Atividade Ekonómika no Sanitária (AIFAESA) hatún despaixu hodi taka provizóriu restaurante (warung–read), Bakso Jumbo iha Fatuhada tanba ai-han hanesan mie ayam (iha lian indonézia) kontaminadu ho formalin.
Koordenadór AIFAESA, Abílio Oliveira Sereno, hatete servisu AIFAESA nian bainhira halo inspesaun iha fatin ne’e no foti amostra mie ayam hodi submete ba laboratóriu no rezulta katak iha formalin.
“Aleinde formalin situasaun ijiene ladi’ak no fatin ne’e entidade ne’ebé fó lisensa para loke buat rua mak lisensa fa’an mina-morin no restaurante, ne’e labele, nia tenke hili ida. Hakarak estabelesimentu atu fa’an de’it perfume ou restaurante, ne’e situasaun ida ne’ebé ami foti para hodi hanorin operadór ekonómiku sira atubele aprende no labele kontinua halo tan”, Abílio hatete bainhira ekipa bá taka estabelesimentu ne’ebé ema sempre vizita barak ne’e iha Fatuhada, ohin.
Nune’e koodenadór foti desizaun tuir lei no fó tempu fulan tolu atu hadi’a estabelesimentu ne’e no na’in ba empreza tenke bá ko’alia ho entidade sira atu loke de’it restaurante ka fa’an perfume.
“Nia na’in rasik kompromete katak loron ikus mai sira sei koordena nafatin ho ami para ami bele foti fali hodi submete ba laboratóriu no nia rezultadu hatete laiha ona formalin no di’ak ona ba saúde maka sira bele fa’an. Mezmu hanesan ne’e sira só bele loke estabelesimentu kuandu entidade ne’ebé fó lisensa mai halo tiha vistoria (inspesaun) para fó fali lisensa”.
Tanba ne’e Abílio husu ba entidade ne’ebé fó autorizasaun atu haree fatin ne’e merese atu loke estabelesimentu antes fó lisensa no lisensa ida ne’ebé iha ona di’ak liu hasai tiha para sira labele kontinua.
“Komesa bá oin taka para sira hadi’a to’o rezultadu husi laboratóriu hatete ona mie ne’e bele han no lahetan formalin no di’ak ba saúde, sira bele fa’an enkuantu funsionamentu depende ba entidade ne’ebé fó lisensa”.
Teste laboratóriu ne’e halo de’it ba mie ayam enkuantu basko seidauk mas justifika ona no daudaun ne’e hapara ona atividade.
“AIFAESA nia serbisu mak defende konsumidór sira. Nia na’in rasik mós konsiente, sira rasik haree katak sira simu no sei halo tuir no hamutuk ho AIFAESA kuandu loke fali (estabelesimentu ne’e) bele fó saúde di’ak ba konsumidór”.
Tanba kontra ona lei mak empreza ne’e sei selu koima ne’ebé jeralmente multa entre dólar 1000 to’o 10.000.
Na’in ba empreza Bakso Jumbo, Dwi Hartanto, husi Indonézia hatete tanba hetan ona karta husi AIFAESA maka sei kumpri tuir lei ne’ebé iha no bá oin sei hadi’ak liután restaurante ne’e.
@tatoli.tl
No comments:
Post a Comment