L-4 Tama Fila-Fali Ospitál PLP Prontu Halo ‘Ezmola’ - ITL | BUAT HOTU KONA BA TIMOR-LESTE

ATUALIDADE

Post Top Ad

L-4 Tama Fila-Fali Ospitál PLP Prontu Halo ‘Ezmola’


Sekretáriu Estadu Asuntu Veteranu, André da Costa Belo ‘L-4’ ne’ebé alta ona husi ospitál iha loron hirak liubá, iha Tersa (21/11), horisehik, tama fila-fali ba Hospital Nasionál Guido Valadares (HNGV), tanba kondisaun kontinua grave.

Sekretáriu Estadu L-4 tama hikas ba ospitál maizumenus tuku 11:30. Oras ne’e baixa hela iha sala VIP númeru 01, hodi hein desizaun Governu hodi dezloka ba tratamentu iha ospitál estranjeiru.

Haree ba situasaun ne’e, Deputadu Bankada FRETILIN, David Ximenes Dias ‘Mandati’, sei halo kontakta ba Governu hodi foti desizaun atu bele buka dalan transfere L4 ba trata saúde iha rai li'ur.

Nia Dehan, orsamentu ba veteranu sira iha hela. Ne’e duni Governu tenke foti desizaun urjentemente evakua lalais L-4 ba ospitál Singapura halo tratamentu.

“La’ós semana ida ne’e, maibé ohin se lae aban ita sei lori L-4 ba Singapura atu halo tratamentu iha ne’ebá”, dehan nia, bainhira vizita L-4, iha ospitál, horisehik.

Ho laran triste Mandati deklara, veteranu ne’e moras hela, tanba ne’e husu ba deputadu opozisaun sira maibé dehan L-4 kondisaun di'ak hela, realidade hatudu ona katak nia grave hela.
Ospitál Singapura ho Governu iha konkordánsia ona hodi evakua ba ospitál Singapura.

Kona-ba dívida sira ne’e, Governu Timor Leste halo ba ospitál Singapura, maibé kontinua trata prosesu ne’e ba oin.

Bainhira evakua L-4 ba sala emerjénsia, hetan mós vizita Ministru Adjuntu Primeiru Ministru asuntu Governasaun, José Maria dos Reis, maibé lakohi fó komentáriu kona-ba prosesu transferénsia pasiente ne'e nian.

Alende ne’e mós jornalista tenta konfirma ho família, maibé sira lakohi fó deklarasaun tanba kondisaun L-4 nian grave hela.

PLP Prontu Halo ‘Ezmola’ 

Relasiona ho kondisaun Sekretáriu Estadu Veteranu, André da Costa Belo ‘L-4’, ne'ebé hetan moras atu halo tratamentu iha li'ur, maibé Governu laiha osan atu transfere. Ne’e duni, Partidu Libertasaun Populár (PLP) prontu atu halo ‘ezmola’ ba militante sira hodi tau hamutuk osan $1 para bele trata Vise-Prezidente PLP ne’e.

Prezidente Bankada PLP, Fidelis Magalhães hatete, kona-ba kondisaun veteranu L-4 nian daudaun ne’e orsamentu iha Ministériu Solidariedade Sosiál (MSS) iha hela atu bele responde, maibé governu mak laiha vontade atu utiliza osan sira ne’e.

“Ami fiar katak iha fundu Governu nian iha MSS atu fasilita. Se laiha karik ami apela ba militante PLP iha territóriu laran tomak ida-idak sei fó $1 ita bele responde ida ne’e”, dehan nia.

Relasiona ho ospitál iha estranjeiru agora ne’e iha ospitál rua ka tolu mak kontratu sei la’o hela. Tanba ne’e, sei bele responde ba situasaun veteranu sira nian.

“Ami lakohi lori fali ema nia moras hodi politiza fali iha Parlamentu Nasionál hodi la onestu ba polítika ne'ebé ita halo”, tenik Fidelis.

Nune’e, Deputada PLP, Chandrawati hatete, veteranu L-4 la halo tratamentu iha estranjeiru la'ós tanba osan mak laiha, maibé nia kondisaun mak la permite atu halo viajen.

@independente.tl

No comments:

Post a Comment