Diálogu bele solusiona tensaun polítika, Alkatiri: Presiza prezensa Xanana Gusmão

Sekretáriu Jeral Partidu FRETILIN, Mari Alkatiri hateten, nia prontu atu halo diálogu no iha optimista katak, liuhusi dalan diálogu ne’ebé promove husi Prezidenti Repúblika, Francisco Guterres bele solusiona tensaun polítika iha rai laran, maibé presiza tebes mós Xanana Gusmão tenki marka prezensa atu  bele hamosu diálogu alargadu ida.

“Problema la’os ho ha’u, tanba ha’u sempre prontu halo diálogu. Maibé Xanana Gusmão tenki prezente, tanba FRETILIN mak partidu mais votadu no tuir kedan mak CNRT. Uluk kedas dehan atu halo koligasaun, inkluzaun no halo insidenti Parlamentar, balun dehan lakohi, ne’e mak agora ita sai tiha hanesan ne’e,” hato’o Sekretáriu Jeral partidu FRETILIN, Marí Alkatiri ba jornalista sira, hafoin enkontru ho Prezidenti Repúblika, Francisco Guterres Lú Olo iha Palácio Prezidensiál, Kuarta (15/11).

Nia hateten, maioria governu sei la garante governu ne’ebé estável, maibé importante mak hatene povu nia hakarak.

“Hotu-hotu hanoin katak, maioria ba governu sei iha estabilidade, se mak dehan maioria de’it iha estabilidade. Uluk ha’u nia maioria ne’e la’os 30 votus, maibé kualifikada, estabilidade laiha, tanba sosiedade tomak ne’e mak importante, konfisoens relijiozas, sosiedade sivíl, povu nia hakarak, la’os ita halo kampaiña dehan buatida i depois sai ba deputadu vota ba buat seluk”, Mari Alkatiri esplika.

“Ita hotu hatene katak Irmao Xanana Gusmão fulan hira ona maka la’o haleu de’it Timor no seidauk tama iha Timor. Tanba ne’e ita atu halo senáriu mós labele. Maibé ita hein nafatin bom sensu sentidu estadu para ita hotu bele halo senáriu ne’e. Sé la’e ita halo fali teatru iha senáriu ida ke ita la hatene atu sai saida,”nia hatutan.

Iha fatin hanesan Prezidenti Parlamentu Nasionál, Aniceto Guterres, ne’ebé halo mós enkontru ho PR Francisco Guterres iha loron ne’ebé hanesan hodi informa funsionamentu Parlamentu Nasional hateten, lider másimu partidu CNRT Xanana Gusmão presiza marka duni prezensa atu diálogu ne’ebé promove husi PR bele la’o.

“Prezidenti iha hanoin atu konvida mós partidu ki’ik sira atu halo diálgu atu nune’e bele sai husi situasaun polítika ida agora ne’e. No presiza prezensa Xanana iha diálgu ne’e. Maibé Prezidenti Repúblika hatudu nafatin ninia vontade atu marka fali tempu seluk atu halo diálogu ho maun boot Xanana”, Aniceto Guterres haktuir.

Nune’e Xefi Estadu Maior Jeneral das F-FDTL, Maijor Jeneral Lere Anan Timur ne’ebé halo mós enkontru ho PR Francisco Guterres Lú Olo iha loron ne’ebé hanesan, iha nafatin konfiansa no esperansa ba lider jerasaun tuan sira sei lori moris di’ak no paz ba Nasaun ida ne’e.

@gmntv.tl