Tribunal Distrital Dili (TDD) fo
prazu loron lima ba eis Ministru Obras Publikas Transportes no
Comunicaseons (MOPTC) Gastão Sousa, hanesan arguidu ba prosesu krime
pekulatu atu halo justifiksaun kona ba nia la marka prejensa iha
tribunal.
Kuando
la halo justifikasaun durante loron lima mak tribunal sei hasai mandadu
kapturasaun ba arguidu Gastão hodi tuir prosesu julgamentu.
Defeza husi arguidu Gastão inklui
arguidu Jordão Maria de Jesus da Silva Sousa ho arguidu Ferlio Afonso
Bado Loi da Silva Sousa hanesan arguidu Gastão nia oan hatete, arguidu
Gastão la marka prejensa ho razaun nia servisu barak, kolen, nia
kondisaun ladun diak atu tuir julgamentu.
Nune’e mos arguidu Jordão Maria de Jesus
da Silva Sousa halao hela estudu iha Australia, nune’e nia la marka
prejensa no arguidu Ferlio Afonso Bado Loi da Silva Sousa la hetan
notifikasaun husi tribunal.
Hatan ba razaun defeza ne’e prokuradora
Lidia Soares la menta no konsidera razaun arguidu Gastão la iha
ligasaun ho tribunal, tanba ne’e prokurador husu ba tribunal atu hasai
mandadu kapturasaunba ba arguidu Gastão hodi mai tuir julgamentu.
Iha sala audensia juiz prosesu António
do Carmo hatete, kuandu arguidu Gastão moras ka kolen tanba servisu
barak, nia tenki aprezenta dokumentus mediku para haforsa nia razaun
ne’e.
“Ita labele nune’e hela deit prejudika
fali arguidu sira seluk ne’ebe marka prejensa, tanba ne’e ita fo prazu
loron lima ba arguidu Gastão atu halo justifikasaun, kaundu nia la
justifka haruka multa U$ 100 no la kumpri ita tenki hasai mandadu
kapturasaun para nia bele marka prejensa iha tribunal,’’ koalia Juiz iha
sala audensia TDD, Sesta (6/10).
Ba
arguidu Ferlio tribunal sei halo notifikasaun foun no ba arguidu Jordao
tribunal sei halo esfsorsu para nia bele marka prejensa.
Juiz prosesu deside adia hikas julgamentu ne’e ba loron 9 fulan Janeiro tinan 2018, tanba arguidu nain tolu la marka prejensa.
Tuir akuzasaun katak, Ministériu públiku
akuza no rekere julgamentu iha prosesu komum bazeia ba artigu 236 no 48
no.2 alínea d, kódigu prosesu penál hasoru arguidu Gastão Francisco de
Sousa, atuál Ministru Obras Públikas, Transportes no Komunikasaun
(MOP), Diogo da Costa nu’udar funsionáriu públiku no atuál Xefe Gabinete
MOP, Jordão Maria de Jesus da Silva Sousa ne’ebé koñesidu ho “Jordy
Sousa”, oan husi Gastão de Sousa, Ferlio Afonso Bado Loi da Silva Sousa
koñesidu ho “Viali”, funsionário Públiku iha Ministériu Negosiu
Estranjeiru no Kooperasau (MNEC) no Martinho Gusmão, saserdote katóliku
iha paroquia Santo António Manatuto.
Iha loron 28 fulan Fevereiru 2010 asina
akondu entre Governu RDTL ho Asian Development Bank (ADB), projetu
finansiamentu ho montante orsamentu hamutuk $ 46.000.000 ne’ebé atribui
ba fundu ba reabilitasaun no konstrusaun Estrada.
Projetu refere remata iha tinan 2012 no
tenki entrega fila fali osan hosi fundu ne’ebe la utiliza ho montante $
82.776,77 dolares Amerikanu inklui viatura 8.
Entre viatura hirak ne’ebe MOP simu konsta viatura ho matrikula 18-948 TLS ho marka toyota land cruiser v8 no viatura 19-754 TLS ho marka toyota kijang innova ne’ebe entrega ba arguido Diogo da Costa.
Na realidade fo konesimentu de’it ba viatura rua seluk ho matrikula 18-723 TLS ho marka toyota rav 4 no viatura 18-947 TLS ho marka toyota land cruiser prado.
Hafoin simu viatura hirak ne’e, tuir
instrusaun verbal hosi arguidu Gastao de Sousa, la fo konesimentu ba
departamentu logistika no MOP kona-ba simu viatura hirak ne’e.
Konkordansia
no kolaborasaun hirak ne’e ho intensaun hodi oinsa bele halakon rejistu
viatura rua ne’e hanesan partimoniu estadu nian.Tuir planu ne’ebe sira
halo ona maka iha loron 24 fulan Setembru 2012, arguido Gastao komunika
ba ADB kona-ba nia desizaun atu atribui viatura rua ho matrikula 18-948
no 19-754 ba unidade jestaun projetu nian inklui manutensaun no
abastesimentu kombustivel ne’ebe finansia hosi ADB.
Maibe realidade hatudu katak viatura ho
matrikula 18-948 rai hela iha Gastao de Sousa nia rezidensia iha aldeia
Becusi bawah, suku Becora.
Arguidu Gastao de Sousa mos permite arguidu nain rua Jordy no Viali hodi utiliza veikulu ba titulu pesoal durante sira nia paseiu iha sidade laran.
Iha data ne’ebe la konkretu, iha final
fulan Abril ka meadu fulan Maio 2014, arguidu Martinho Gusmao solisita
verbalmente ba arguidu Gastao Sousa hodi husu ajuda viatura ida ba
preparasaun serimonia komemorativa tinan 200 paroquia Manatuto nian no
iha loron 13 fulan Maio 2014 arguidu Gastao Sousa entrega pesoalmente
viatura ho matrikula 19-754 TLS ne’ebe uza hela ba titulu privadu hosi
arguidu Diogo da Costa.
Arguido Martinho Gusmao utiliza viatura
refere durante tinan 1 fulan 3 no bainhira uza viatura refere Martinho
Gusmao solisita dala 2 ba Gastao Sousa hodi halo manutensaun ba viatura
iha loron 14 fulan Junho 2014 no loron 28 Agostu 2014 ne’ebe uza osan
husi fundu ADB nian ho montante $ 532,34 dolar amerikanu.
Bazeia ba akuzasaun hirak ne’ebe iha
maka konsidera katak bens no ekipamentu hirak ne’ebe sira uza pertense
ba Estadu, mezmu nune’e, sira aproveita patrimoniu publiku ba benefisiu
propriu maski hatene katak aktu sira ne’e prezudika Estadu.
Nune’e,
arguidu Gastao de Sousa hetan akuzasaun primeiru,hosi MP ho krime
pekulatu kontra artigu 295 no. 1& 3 ba autoria material ho arguidu
Diogo da Silva, segundu, krime pekulatu ida seluk maka kontra artigu 295
no. 1, 41no 34 ba autoria material ho arguidu Jordy Sousa no Viali,
terseiru maka krime administrasaun danoza kontra artigu 274, no 2 & 3
ba kumplisidade ho arguidu Martinho Gusmao.
Arguidu Diogo da Costa MP akuza ho
primeiru, krime pekulatu, iha artigu 295 no. 1& 3 ba autoria
material ho arguidu Gastao de Sousa, segundu nafatin ho krime pekulatu
hosi artigu 295 no 41 no terseiru maka krime falsifikasaun dokumentu
kontra artigu 303 no 1 alinea A no 41.
Arguidu Jordy sousa no Viali komete iha
co-autoria material ne’ebe MP akuza ho krime pekulatu kontra artigu 295,
no 1, 41 no 34 ba autoria material ho arguidu Gastao de Sousa.
Arguidu MG komete ba kumplisidade
material ne’ebe MP akuza ho krime administrasaun danoza kontra artigu
274, no 2 & 3 ba kumplisidade ho arguidu Gastao Sousa.
*gmntv.tl
No comments:
Post a Comment