CNRT, PLP no KHUNTO forma bloku AOMP kontrola Governu *Konsidera PR Lu-Olo la kumpri regras konstitusional

Partidu opozisaun CNRT, PLP no KHUNTO forma bloku Aliansa Opozisaun  Maioria Parlamentar (AOMP) hodi kontrola sétimu  Governu nia Governasaun.

Xefi bankada PLP, Fidelis Magalhães,  hateten, bloku opozisaun maioria Parlamentar ne’e,  harii bazeia ba kadeira ne’ebé barak liu iha Parlamentu Nasionál.

“Povu tenki hatene katak, iha Parlamentu Nasionál partidu tolu mak maioria hanesan, CNRT, PLP no KHUNTO. Entaun CNRT mak sei lidera bloku ida ne’e, tanba CNRT iha kadeira 22, PLP iha kadeira 8, no KHUNTO iha kadeira lima,” katak Fidelis, ba jornalista sira iha PN, Sesta (06/10).

Tuir Fidelis, métudu ne’ebe mak atu aplika iha bloku opozisaun maioria Parlamentar ne’e mak metudu kolejial, bazeia ba respeta malu.

Fidelis dehan, normalmente Bloku partidu tolu ne’e, harii bazeia ba votus partidu ne’ebé barak liu ka kadeira barak liu iha Parlamentu Nasionál, nia mak sei lidera bloku ne’e.

“Partidu tolu ne’e, iha konsertasaun polítika hanesan forsa polítika iha Parlamentu Nasionál ne’e, maibé la signifika katak, lider masimu PLP, Taur Matan Ruak mak atu diriji fali bloku ida ne’e,” afirma Fidelis Magalhães.

Nia afirma, bloko AOMP ne’e, sei aprezenta sira-nia an hanesan forsa Parlamentar ida, ho polítika ne’ebé konsentradu iha Parlamentu Nasionál.

“Bloku ida ne’e, maioria iha Parlamentu Nasionál, signifika kompozisaun partidu tolu ne’e, sei transforma sai forsa polítika ida, tanba partidu tolu ne’e, iha kadeira 35, liu fali Governu ne’ebé kadeira 30 de’it,” relata Fidelis.

Nia afirma, konsertasaun polítika ne’e, atu haree mós ba intendimentu ba programasaun polítika partidu tolu ne’e nian.

“Konsertasaun polítika ne’e nia signifikadu mak bainhira ita aprezenta no define polítika ida ne’ebé  hanesan, programa ne’ebé bele lori moris diak ba ita-nia povu. Entaun ami bele hamutuk aprezenta programa alternativa ida ba nasaun,” katak Fidelis.

Iha fatin hanesan, Xefi bankada CNRT, Arão Noe, hatete, ne’e asuntu polítika altu nivel partidu nian. “Sei to’o iha ne’eba,”dehan Arão.

 La kumpri regras konstitusional

Nune’e mós, Partidu CNRT, PLP no KHUNTO mós hato’o ona karta pedidu ida ba Prezidenti Repúblika, Francisco Guterres ‘Lu-Olo’ hodi apresia desizaun Prezidenti Repúblika nian ne’ebé tuir regras konstitusional. Maibé tuir Bloku AOMP nia haree, iha  prátika Xefi Estadu  la kumpri objetivu material husi regras konstitusional ne’ebé mak iha.

Karta pedidu ne’ebé mak partidu opozisaun tolu ne’e hato’o ba Prezidenti Repúblika, Francisco Guterres ‘Lu-Olo’ katak, desizaun hotu ne’ebé Prezidenti Repúblika foti ba formasuan VII Governu ne’e, tuir duni konstituisaun, maibé la kumpri regras konstitusional ne’ebé mak iha, no atribui hikas ba Parlamentu Nasionál atu responsabiliza hodi válida ka konfirma desizaun hirak ne’ebé la prudente ba formasaun VII Governu konstitusional ne’ebé la garante katak, desizaun ida ne’e aseguradu tiha ona hodi hetan apoiu parlamentar ne’ebé nessesáriu ba ezersisiu nia asaun Governativa.

Deputadu hirak ne’ebé mak subskreve iha karta ne’e, la ignora mós ba alinea D husi artigu 85, husi lei fundamental Estadu nian, hodi atribui ba Prezidenti Repúblika nia responsabilidade hodi fó posse ba Primeiru Ministru ne’ebé partidu mais votadu ka aliansa partidu sira ho maioria Parlamentar sei foti, hafoin rona tiha partidu sira ne’ebé iha Parlamentu Nasionál.

“Ho nune’e iha biban ida ne’e, ami rekoñese katak, Prezidenti Repúblika la halo tuir tradisaun konstitusional Timor Leste nian, no la konsidera presedente hirak ne’ebé mak mai tiha ona husi Prezidenti Repúblika sira uluk, tanba wainhira haree ba inkapasidade husi mais votadu nian hodi forma akordu ho partidu polítika sira seluk, oferese nu’udar solusaun diak liu ba Governasaun ne’ebé harii metin ho maioria Parlamentar ida,”hateten karta pedidu ne’e.

Karta ne’e haktuir, Prezidenti Repúblika soe ba Parlamentu Nasionál, responsabilidade ida ba estabilidade Governativa nian ne’ebé sei propoin husi VII Governu konstitusional.

Karta ne’e hatutan, deputadu sira iha Parlamentu Nasionál mós konsiente katak, tuir Estadu Timor Leste nia padraun konstitusional, iha responsabilidade atu ho vontade no determinasaun hodi defende promove no aprova polítika no programa sira hotu, ne’ebé serve ba intrese nasionál, hodi impulsiona dezenvolvimentu ne’e la ekivale hodi afirma katak, deputadu sira disipostu hotu atu kuriji liu husi Parlamentar erus hirak ne’ebé ema balun halo ho imprudensia polítika.

“Ami la ignora katak, depois de nomeia no imposa tiha VII Governu konstitusional ida ne’ebé la hetan apoiu husi maioria Parlamentar ida, kabe ba ezekutivu foun ne’e hodi dezenvolve esforsu tomak atu hatama iha programa Governu nian, medida no polítika hirak ne’ebé bele.

*gmntv.tl