Díli, 26 Outubru 2017: S.E. Primeiru-Ministru, Dr. Marí Alkatiri hala’o enkontru semanál ho S.E. Prezidente Repúblika Dr. Francisco Guterres Lú Olo, ohin iha Palasiu Prezidensia Nicolau Lobato.
Iha Sorumutuk ida ne’e, Xefi Governu informa ba Xefi Estadu, servisu publiku sira ne’ebe lao daudaun iha rai laran, inklui preparasaun orsamentu ratifikativu.
Primeiru-Ministru informa mós Prezidente Repúblika, preparasaun governu atu kria dekretu lei orgániku do governo ne’ebe sei aprezenta iha Konsellu Ministru hodi hetan aprovasaun no tuir mai sei lori ba Prezidente Repúblika hodi hetan promulgasaun.
Primeiru-Ministru iha biban ida ne’e hatoo mos pontu de situasaun ba Prezidenti Repúblika kona-ba situasaun polítika iha rai laran.
“Esperiensia ne’ebe ita hetan agora,iha dalan atu fo fila hikas ba povu hodi desidi. Iha desizaun rua; Primeiru mak eleisaun antisipada, segundu mak aprova lei atu loke dalan ba referendu. Governu oras ne’e daudaun prepara hela proposta lei ba referendu atu haruka ba Parlamentu Nasional,” haktuir Primeiru-Ministru.
Iha Sorumutuk ida ne’e, Primeiru-Ministru informa mos ba Prezidente Repúblika, viajen de traballu ne’ebe sei halao husi Primeiru-Ministru no komitiva, ba Perth, Austrália, iha loron 1 Novembu 2017 hodi hola parte iha Konferénsia bot ida kona-ba Ekonómika Finanseira,
“Iha konferensia ida ne’e, Timor-Leste mós sei fahe nia esperiénsia kona-ba Polítika Dezenvolvimentu Timor-Leste nian,” haktuir Primeiru-Ministru.
Akompaña iha viajen de traballu dahuluk Primeiru-Ministru nian ba Perth, Australia, mak Ministru-Adjuntu Primeiru-Ministru ba Delimitasaun Fronteiras Sr. Agio Pereira, no Ministru Estadu no Ministru Agrikultura i Peska ,Eng. Estanislau da Silva.
Tuir orariu, Primeiru-Ministru ho komitiva sei fila hikas mai Timor-Leste iha loron 6 Novembru 2017.
@ FB Gabinete do Primeiro-Ministro
No comments:
Post a Comment