PN Sei Simu Programa Governu Iha Semana Oin

Parlamentu Nasionál iha semana oin sei simu ona programa sétimu governu hodi halo apresiasaun durante loron lima nia laran, ho ida ohin, Kinta (05/10) lider bankada sira halo reuniaun hodi prepara giaun apresiasaun ba programa.

Portavós Parlamentu Nasionál (PN), Lidia Norberta esplika, bankada sira ohin halo reuniaun hodi ko’alia kona-bá giaun apresiasaun programa governu.

“Iha reuniaun lider bankada ohin ko’alia konaba giaun apresiasaun ba programa governu dahituk konstitusionál tanba tuir artigu  108 konstituisau iha prazu loron 30, governu tenke prepara programa no aprezenta mai Parlamentu Nasionál”, Sekretária Meza PN, Lídia Norberta informa liuhosi konferénsia imprensa iha Uma Fukun, ohin.

Nia dehan, tuir koordenasaun ne’ebé iha governu sei aprezenta programa mai PN iha semana oin. No tuir artigu 109 hateten, katak PN hafoin simu programa governu ne’e sei halo apresiasaun ba programa governu.

“Prazu ba apresiasaun hosi Parlamentu Nasionál ba programa governu tuir artigu 109 maka loron 5. Iha loron 5 nia laran, deputadu sira sei debate,” Norberta esplika.

Ho louva katak, governu ida ne’e maski nia estrutura seidauk kompletu, maibé tuir informasaun programa governu nian preparadu ona.

*tatoli.tl