Eis deputadu 20 mak foin entrega Prado ba PN “Deputadu foun kontinua sa’e motor”

Portavoz Parlamentu Nasional  (PN), Lidia Norberta, informa, kareta Prado ne’ebé deputadu III lejislatura uza, to’o agora foin entrega 20 ba PN hosi eis deputadu sira ne’ebé la re-eleitu ba IV lejislatura.

“To’o agora foin entrega kareta 20 ba PN,”informa Lidia Norberta ba jornalista sira iha PN, Sesta (06/10/2017).

Enkuantu deputadu III lejislatura nian re-eleitu fali iha IV lejislatura hamutuk 25 inklui eis Prezidenti PN, Adérito Hugo da Costa. Total kareta III lejslatura nian agora dadaun hamutuk 45 mak iha Parlamentu Nasional, no 20 seluk seidauk entrega hosi eis deputadu sira ba parlamentu nasional, tanba ne’e deputadu IV lejislatura kuaze uza transporte privadu no balun seluk kontinua uza motor ba servisu iha PN.

Antes ne’e, hafoin Movimentu Universitariu Timor-Leste (MUTL) halo manifestasaun hodi ejize ba PN, atu kansela leilaun kareta Prado ho folin U$ 8000 kada kareta,  no bankada haat, kompostu hosi bankada CNRT, FRETILIN, PD no Frenti-Mudança, deklara tiha ona liu hosi konferensia imprensa ba públiku, katak sei entrega fila fali  kareta ho marka Prado ne’ebé Estadu fasilita lori hala’o servisu nu’udar reprezentante povu iha PN, wainhira mandatu remata. Maibe to’o agora eis deputadu sira barak  seidauk entrega kareta refere ba PN.

Tuir observasaun GMN iha PN, kuaze deputadu re-eleitu sira mós uza de’it transporte privadu, no kareta Prado ne’ebé simu hosi mandatu III lejislatura nian para de’it iha resintu PN oin.

*gmntv.tl