PN manda karta ba governu interven folin sasan

Meja Parlamentu Nasional (PN) manda ona karta ofisial ba Governu, liu hosi Ministeriu Komersiu Industria no Ambiente hodi interven negosiante ne’ebé manipula folin sasan, liu-liu fos iha merkadu.

“Deputadu hotu preokupa ho asuntu ne’e, tanba ne’e mak meja parlamentu mós haruka kedas karta ofisial ida ba governu, ministeriu relevante, halo kedas fizkalizasaun ba folin fos iha merkadu,”dehan Sekretaria meja Parlamentu Nasional, Lidía Norberta, ba jornalista iha uma fukun PN, Sesta (27/10/2017).

Lídia esplika, espekulasaun públiku hodi aproveita situasaun ne’e sai preokupasaun bo’ot ba reprezentante povu hosi bankada 5 iha Parlamentu Nasioanal.

Nia apela ba públiku, iha negosiante ka kompañia ruma ne’ebé aproveita oportunidade hodi hasa’e folin sasaan, uma fukun PN loke dalan atu públiku hato’o keisa.

Relasiona ho preokupasaun ne’e, Komisaun D, ne’ebé trata asuntu ekonomia no dezenvolvimentu, tun direta hodi halo kedas inspesaun ba fos iha Sentru Lojístika Nasional Tibar.

Hafoin halo inspesaun, Prezidente Komisaun D, Deometro Carvalho, informa, rezultadu fizkalizasaun katak, folin fos normal, no iha negosiante ruma mak koko halo espekulasaun.

“Ita persebe katak iha espekulador balun halo mak halo espekulasaun presu, tanba ne’e parlamentu halo inspesaun, atu bele fo nesesariu ba governu hodi tau matan ba asuntu ne’e, inspesaun ida ne’e hodi atribui knaar ne’ebé parlamentu iha,”dehan Deometro.

Sorin seluk, Diretora Aprovizionamentu Armajen ba Sentru Lojistika Nasional (SLN), Julmira Belo afirma, dirasaun aprovizionamentu hatun ona ekipa ba baze hodi interven negosiante ne’ebé inventa folin fos.

Julmira informa, folin fos importa, normal hela ho montante U$ 11 kada saku, tuir kontratu ne’ebé parte relevante iha ho kompañia sira.

“Fos importasaun ne’e ami halo intervensaun merkadu direta no indireta, liu hosi kompañia lokal sira, ho nia presu diferente kada munisípiu, tuir kontratu, sira tenke faan ba populasaun ho folin dolar sanulu resin-ida,   fos local, bazeia ba hare kulit ne’ebé ami dulas,  se hare kulit 2015 nian, dolar 11 ho sentavus hitu-nulu resin-lima, hare kulit ne’ebé ami sosa iha 2016, ne’e dolar sanulu resin-tolu ho sentavus hitu-nolu resin-lima,”Julmira afirma.

Relasiona ho kestaun ne’e, Ministeriu relevante esforsu liu hosi Sentru Lojístika Nasional, estabelese ona ekipa, tun direta ba munisípiu sira, atu halo levantamentu dadus hodi bele hatene loloos presu fos iha munisípiu ne’e sa’e tebes ka la’e!, informa Diretora SLN ne’e.

@gmntv.tl