MUTL Sujere Kansela Sosa Prado

Parlamentu Nasional (PN) simu ona karta husi Movimentu Universidade Timor-Leste (MUTL), sujere atu kansela tiha politika sosa Prado foun ba reprezentante povu husi bankada lima, maske antes nee deputadus terseira lejistura aprova ona orsamentu hodi hein implementa deit.

Tuir Portavoz PN Lidia Norberta, bazeia ba karta neebe MUTL fo iha loron 2 Outubru neebe liu loron 3 ona no MUTL hein hela sira nia manifestasaun no husi PN konsidera direitu sira nian hodi hatoo sira nia aspirasaun. MUTL sira nia aspirasaun nee tuir lei iha konstituisaun artigu 48, maibe husu atu koopera ho autoridade seguransa nian.

Konteudu husi karta MUTL mak sujere atu kansela ba desizaun neebe foti ona iha PN sosa prado foun, maibe ida nee PN hanesan mahon ba lejislasaun hotu neebe bainhira kria desizaun tenke kumpri,” informa Lidia liu husi komferensia imprensa iha PN Kinta (05/10/2017).

Nia hatutan, desizaun neebe foti ona nee difisil atu halao, mezmu difisil tenke halao ho rigor. Tanba, Konsellu Administrasaun reuniaun ona sei lori ba iha plenaria neebe desijaun nee tenke kontinuasaun ba komprimisiu neebe mak iha III too IV lejislatura.

Portavoz nee esplika relasiona ho karta nee, Prezidente Parlamentu Nasional hakarak atu hasoru malu ho reprezentante MUTL atu halo dialogu.  No husi MUTL sira mos hakarak atu halo dialogu ho Prezidente, mezmu seidauk iha data fiksu tanba agora dadaun sei halo diskusaun atu haree tempu.

Kona ba preokupasaun kareta Prado tuan balun neebe seidauk hatama lidia hateten, too agora deputadu sira neebe mak la eleitu fila fali foin nain 20 mak hatama ona, maibe sira seluk seidauk. Kuandu konta ho deputadu sira neebe mak re-eleitu fali numeru nee boot maibe kona ba dadus seidauk hatama nee parte konsellu administrasaun mak bele hatene diak liu.

Portavoz nee mos informa programa no atividade PN nian ba loron horseik mak hanesan reuniaun lider bankada enkontru kona ba asuntu atu trasa iha semana oin, sei koalia kona ba guia apresiasaun programa setimu governu konstitusional tanba tuir artigu 108 liu prazu 30 dias hodi aprezenta iha Parlamentu Nasional, koalia mos kona ba konsellu superior defeza seguransa atu nomeia ema nain 3 hodi reprezanta PN. No iha semana oin mos sei koalia ba papel deputadu atu halao knar nuudar diplomasia parlamentar.

Nia hatutan tan, sei halo eleisaun ba Komisaun Funsaun Publika no Konsellu de Estadu tanba iha semana kotuk nomeia tiha ona membru nain 2. Maibe, tanba iha kandidatu ida hola parte tiha iha VII governu hanesan L4. Ho razaun nee sei halo nomeia fali kandidatu seluk atu bele troka L4 nia fatin.

*STL