‘Malae’ barak halai husi area Branca

Ministru Estadu e Conselheiro ba Seguransa Nasional, José Ramos Horta, tau preokupasaun maka’as ba mentalidade joventude sira nian ne’ebe halai ho motor “rungu-ranga” iha Area Branca.

Ramos Horta afirma katak, ho atetude sira ne’e halo ‘male’ barak halai ona husia Area Branca no senti la seguru ona halo viagen turistiku iha Area Branca nian.

“Hakarak dezenvolve setor turismu, tenke mai husi ita nia hahalok. Muda ita nia mentalidade no  joven  sira  tenke  hatudu komportamentu ne’ebe diak, laos rungu-ranga iha Area Branca. Hau agora loraik la ba ona area Branca no turista    sira  mos  halai ona tanba joven sira ho motor halo rungu-ranga   iha  area Branca,”  hateten Ramos Horta, iha serimonia loron mundial turismu iha Saklaun Universidade Nasional Timor Lorosae (UNTL), Sabadu (30/9/2017).

Horta mos informa katak, durante ne’e nia bolu polisia dala wain ona atu bele atua motor sira halai rungu-ranga iha Area Branca, maibe polisia nunka mosu. Tanba ne’e, tuir Horta, lalika koalia setor turismu wainhira povu rasik la hatudu dedikasaun no la konsiensia.

Wainhira sai orador no fahe esperensia iha seminariu loron mundial turismu ne’e, Ramos Horta, fo sasin katak, ambiente sidade Dili agora foer tebes. Iha fatin barak nmo bairo-bairo nakunu ho lixu organiku no naun organiziku. Nune’e mos iha tasi ibun sira kontamina ho foer no lixu ne’ebe soe la tuir nia maneira ida justu ho responsabilidade.

Horta husu ba xefi suku xefi aldeia grupo joventude  hadomi rai tenke  organiza  a’an. Lalika hein ajuda husi Governu husu komunidade la bele so’e lixu arbiru no tenke hili foer sira ne’ebe iha be dalan no tenke hamos uma.

“Ha’u hakarak hare pelo menus kada semana povu rasik hakat ba Estrada hodi hamos bairo ne’e hau kontente los, ho ida ne’e bele muda komportamentu,” hateten Ramos Horta .

Iha biban ne’e mos Dekanu Fakuldade Ekonomia  UNTL, Fernando Batista Anuno, hateten matenek laos mai husi teoria ne’ebe aprende husi Universidade maibe importante mos orador sira fahe esperensia ba estdante bele kompleta siensia ne’ebe estudante sira aprende.

“Hau hanoin eventu importante atu bele fo hanoin  ba estudante no papel inportante ba edukador iha fakuldade ekonomia liu liu departamentu turismu bele responde no bele dezemvolve  turismu iha Timor Leste,” dehan Fernando.

Nia mos dehan, papel estudante tenke kontinua promove nafatin oinsa mak bele  hadomi natureza maske estudante halo ona ho nia kapasidade ne’ebe naton.

“Hau hanoin oituan bei-beik to’o bo’ot partisipasaun estudante kontribui ba prosesu tomak estudante sira bele kontibui bele halo limpeza jeral   oinsa mak ita nia prejensa iha komunidade presija muda mentalidade,” hateten Fernando.

Nia mensiona mos katgak, atu muda ema nia mentalidade imporante oinsa bele lori ema nia konsiensia hodi bele responde ba iha prosesu dezemvolvimentu, laos iha topu medium no to’o iha area rural hodi bele responde dezemvolvimentu iha Timor Leste.

*gmntv.tl