Fundus Boot, Xineza Domina Atividade Komersial

Atividade negosiu neebe iha rai laran domina ho ema estranjeirus liu liu maluk Xinezas no problema nee akontese tanba ema mai ho fundus/kapital boot.

Kestaun nee fo sai husi Diretur Jeral (DJ) MCI, Virgilio dos Santos ba STL, Segunda (09/10/2017) iha nia knar fatin Fomento Dili.

Hau hanoin governu iha politika neebe diak atu regula atividade komersial iha rai laran, maske TL adopta ona merkadu livre maibe laos buat hotu tenke livre tanba nee governu sei buka meius atu regula komersial,”informa Diretur Jeral MCI.

Nia mos informa liu tan katak, MCI mos servisu hamutuk ona Suku Findo husi Indonesia, atu estabelese lei ida hodi halo verifikasaun produtu importasaun sira neebe mai husi rai liur. Tan nee sei iha Lei ida atu bele halo kontrola diak liu tan ba atividade hotu hotu neebe lao iha baze.

Tuir DJ nee katak, ba futuru governu liu husi MCI sei rekomenda atu bele establese tan lei nee hodi kontrola diak liu tan produtu sira neebe tama sai iha rai laran, karik iha produtu balun neebe Timor oan sira bele halo, maka la presiza tan ema estranjeiru sira atu halo tan iha rai laran.

Iha parte seluk Reprezentante povu iha uma fukun Parlamentu Nasional, Deputadu David Dias hateten, problema ida nee Deputadu sira iha nee mos preokupa tanba joven barak maka loron ba loron sai ba buka servisu iha ema nia rai.

Hau hanoin dezempregu iha rai laran aas tanba, Xina mai domina merkadu negosiu, ate kios deit mos Xina bele mai loke too Timor, no sira mai loke tan loja one dollar iha rai laran ida nee atu hamate Timor oan sira, lolos atividade sira hanesan nee Timor oan maka bele halo, laos Xina tanba nee governu ida nee tenke haree didiak oinsa bele regula atividade komersial iha rai laran,”informa nia.

Nunee mos Julio Gomes hanesan setor privadu hatutan,  atividade negosiu neebe lao iha rai laran domina liu ema estranjierus, problema nee akontese tanba governu rasik la regula didiak atividade negosiu iha baze.

Nia esplika, tuir lolos nee tenke haree ema neebe mai ho kapital boot maka bele, halo negosiu iha rai laran, atu nunee bele kria mos kampu servisu ba Timor oan sira, maibe realidade neebe akontese loja Xina nian balun nain maka hein, rasik lolos nee labele akontese hanesan nee tenke fo servisu ba Timor oan sira.