Fos Kontinua Tama Portu Dili

Atividade iha portu Dili oras nee lao diak hela, nesesidade baziku sira hanesan fos no nesesidade sira seluk oras nee kontinua tama iha portu Dili, maske folin nesesidade baziku oras nee hahu sae.

Kestaun nee fo sai husi Vokal II Portu Dili, Vitor Maia ba STLKinta (19/10/2017) iha Parlamentu Nasional. “Hau hanoin atividade neebe lao iha portu Dili nee sei laiha relasaun ho debate programa governu iha Parlamentu Nasional. Tanba setor privadu sira nafatin halao sira nia atividade hodi halo importasaun ba nesesidade baziku inklui fos.

Folin tun ka sae nee fila fali ba importador sira, tanbe kontrola ami nian maka, atu haree movimentasaun iha portu,” informa vocal nee iha Portu Dili.

Nia informa katak, atividade ou movimentasaun iha portu Dili lao normal hanesan, bain-bain sasan neebe tama iha portu maka, nesesidade baziku, fos inklui material konstrusaun.

Iha fatin hanesan Deputadu Ernesto Fernandes Dudu hatutan katak, komunidade iha Ermera preokupa tanba nesesidade baziku hotu liu liu fos.

Hau hanoin ita tenke konsideira povu nia halerik sira nee, karik fos mala menus duni oinsa povu atu moris, tanba nee husu atu toma konsiderasaun,”informa nia.

Nunee mos Domingos da Costa hatutan, stok fos no nesesidade baziku iha loja nakonu, nia folin normal.“Ami nia sasan neebe fan iha loja nee, folin nafatin tuir standar neebe maka governu hasai tiha ona, fos 25 kg nee ho folin, 12 dolar, mina 5 Liter u$ 5 dolar, masin minar kg 1 satu dolar,”informa nia.

@STL