PR garante Timor-Leste ultrapasa krizi polítika

Diretor Ezekutivu Forum Organização Não Governamentais Timor-Leste (FONGTIL), Arsenio Pereira da Silva, informa, Prezidenti Repúblika (PR), Francisco Guterres ‘Lú Olo’ sei esforsu atu Timor-Leste (TL) ultrapasa krizi polítika ne’ebé la’o iha rai laran.

“PR fó korajen ba ita hotu no sosiedade tomak, para mantein paz no estabilidade, para ema hotu-hotu hala’o nia knaar hodi kontribui ba rai ida ne’e, PR rasik mós garantia katak sei esforsu-an tomak, para depois ho ninia knaar PR no knaar konstituisaun halo buat ruma com que Timor bele iha situasaun ida diak no ultrapasa situasaun polítika agora dau-dauk ne’e,”Diretor Ezekutivu FONGTIL ba jornalista sira hafoin remata enkontru ho PR, iha Palasiu Prezidensial, Bairo Píte, Díli, Sesta (27-10-2017).

Arsenio da Silva, esplika, PR hakarak hasoru malu ho lider polítiku no nasional atu ultrapasa situasaun ida ne’e, nune’e FONGTIL no Governu hanesan parseria iha vontade halo dezenvolvimentu ba komunidade iha area remota no rural sira, hodi kontribui ba dezenvolvimentu nasaun.

“PR enkoraza nafatin ba Sosiedade Sivil, nia mós prontu nafatin apoiu kualker asuntu ne’ebé Sosiedade Sivil iha Timor-Leste atu koalia,” dehan Diretor Ezekutivu FONGTIL.

Nia akresenta, FONGTIL update servisu Sosiedade Sivil nian ba PR, liu-liu FONGTIL ninia servisu no programa sira ne’ebé hala’o tiha ona no mós obstakulu ne’ebé iha, liu-liu servisu sira iha area remota to’o nivel internasional nian.

“Ami aprezenta mós susesu sira ne’ebé iha, FONGTIL reprezenta Sosiedade Sivil Timor-Leste ne’ebé hetan premiu paz nian iha fulan Setembru liu ba, aproveita tempu FONGTIL konvida mós PR atu halo abertura ba asembleia jeral FONGTIL ne’ebé sei halo iha fulan Novembru, tinan ida ne’e,” hateten Arsenio da Silva.

Nia afirma katak, PR apresia tebes ho servisu ne’ebé maka FONGTIL halo ona no fó hanoin mós katak diak liu mós servisu sira ne’e bele halo imprimi kada fulan 6, para públiku mós bele hatene, tanba durante ne’e servisu ne’ebé maka FONGTIL halo ne’e ema barak la hatene.

Auditoria sosial ne’ebé FONGTIL hala’o ne’e haree liu ba area haat (4) hanesan agrikultura, saúde, edukasaun no infraestrutura báziku, no fundus mai husi União Europeia.

@gmntv.tl