Veteranu Husu Aselera Kriasaun Konsellu Veteranu

Veteranu sira hala´o enkontru ho Prezidente Repúblika, Francisco Guterres Lú Olo hodi husu Prezidente Repúblika aselera kriasaun Konsellu Veteranu ne´ebé maka dekretadu iha 2009 liu-ba maibé ninia implementasaun to´o agora seidauk realiza.

“Ami husu audiénsia ho Prezidente Repúblika atu buka hatene oinsá maka atu hari konsellu ida ne’e,” reprezentante veteranu, João Miranda “Aluc” informa asuntu ne´e ba jornalista sira iha Palásiu Prezidente Nicolau Lobato, Bairru-Pité, Dili, segunda ne´e.

Aluc esplika konteúdu kriasaun Konsellu Veteranu ne´e atu engloba veteranu hotu-hotu ne´ebé maka durante prosesu funu naruk ne´e iha frente tolu hanesan Frente Armada, Klandestina no Diplomátika.

“Frente tolu ne’e ho situasaun ida agora, laiha estrutura, ida-idak la´o ninian. Ida ne´e maka preokupasaun oinsá atu kria konsellu ida ne´e para engloba veteranu sira ne´e,” nia hatutan.

Veteranu ne´ebé sei ativu iha Instituisaun Forsa Armada ne´e informa katak lista veteranu ne´e lista ida ne´ebé boot lahalimar, tanba ne´e maka iha nesesidade kria Konsellu Veteranu para revee hikas kestaun ida ne´e.

“Ami husu mós ba iha governu atu aselera prosesu ida ne´e nune´e evita situasaun ida ne´ebé maka ita hotu akompaña katak ema barak akuza veteranu sira hadau malu projetu. Ida ne´e akontese tanba seidauk iha konsellu ida hodi kontrola veteranu sira,” Aluc esklarese.

Iha biban ne´e, Prezidente Repúblika, Dr. Francisco Guterres Lú Olo responde katak nia sei halo esforsu tomak buka maneira oinsá iha tempu badak hetan solusaun ida kona-ba Konsellu Veteranu.

*tatoli.tl