TNI buka nia Herois, PN eziji governu husu RI hatudu rate Nicolau Lobato

Parlamentu Nasional (PN) eziji governu atu husu Estadu Republika Indonesia (RI) hodi hatudu rate saudozu Prezidente Nicolau Lobato nian tamba Tentara Nasional Indonesia (TNI) mos komesa buka tuir sira nian ema nebe mate iha Timor-Leste.

“Ita nu’udar umanu, ha’u nia haree ne’e los tebes, ema mate ona ita respeita, maibé komu sira mai ona buka tuir isin maten sira ne’e, karik bele Prezidenti Parlamentu Nasionál hato’o ba Governu atu besik Governu Indonesia, atu fó sai tok uluk kalan-kalan militar Indonesia sira lori sai subar ba oho iha ne’ebé?, ita lahatene. Ita nia heroe nasionál Nicolau Lobato, António Carvarinho, Hanis Basarova, 12 Novembru nian, 10 Juñu no 1983 ninian, se karik bele, sira mós nu’udar umanu, hatudu mai para ami mós bele ba buka atu halot fali iha fatin ne’ebé dignu,” relata David Dias Ximenes iha plenária PN, Segunda (25/09).

David Dias haktuir, bo’ot sira husi Indonesia mai halo diskursu iha Timor Leste katak, haluha ona tempu uluk, maibé haluha ne’e la’os dehan katak, mate isin sira ne’ebé se namkari hela ne’e, tenki haluha hotu.

“Sira ne’ebé hatene ne’e, se moris hela, Panglima Gatot se moris, Manggala se moris, ami husu para ami nia mate sira ne’e fó mai, tanba sira ne’e mós ema,” relata David Dias.

Alende ne’e, Xefi bankada PLP, Fidelis Magalhães mós hateten, iha eis Prezidenti Repúblika nia tempu, sira husu ona ba Prezidenti Repúblika Indonesia, Joko Widodo.

“Agora iha abertura foun, no ida ne’e mós ezije katak, governu foun bele redefine diak liu tan, polítika externa Timor Leste nian, tanba oportunidade iha, no agora ita haree vontade polítika ne’e to’o iha ne’ebé,” katak Fidelis.

Nia hatutan, dinámika relasaun entre nasaun rua ne’e (TL-RI), agora iha faze ida ne’ebé hanaran interdependensia, tanba agora TL hanesan alat ba polítika externa, no TL nia pozisaun ba polítika externa ne’e mós, diferente ona.

Iha semana kotuk, Jeneral TNI, Panglima Gatot Nurmayanto mai vizita Timor Leste (TL), hodi buka tuir forsa Indonesia sira ne’ebé durante okupasaun iha Timor-Leste.

No iha semana ida antes military Indonesia ema nain 80 mai aviaun military Indoensia nian hodi hadia rate military Indonesia iha Baucau no Jardim Herois military Indonesia iha Santa Cruz, Dili.

*gmntv.tl