TL Exporta Budu Tasi Tonelada 60 Ba Estranjeiru

Timor Leste (TL) exporta ona Budu Tasi ho montante toneladas 60 ba nasaun estranjeiru hanesan Filipina no Vietnam, nasaun rua nee husu kuantidade neebe boot tanba, kualidade budu tasi iha TL nee diak.

Kestaun nee fo sai husi Diretur Jeral Peskas, Acacio Guterres ba STL, Kuarta (20/09/2017) iha Hotel Arbiru Pante Kelapa Dili.

Iha semana kotuk ita halo ona exportasaun Budu Tasi toneladas 60 ba Nasaun rua nee, haree ba kualidade Budu Tasi husi TL nian nee diak, tanba nee ema husu kuantidade neebe boot maibe, ita seidauk bele responde hotu tanba, ema neebe hakiak budu tasi nee outiaun deit, tanba nee kuantidade exportasaun kiik,”informa nia.

Tuir Diretur nee katak, hare ba permintaan pasar nee diak tebes tanba nee, planu governu nian ba oin tenke eduka povu hodi hakiak Budu Tasi, tanba kuantidade neebe ema husu nee boot tebes, toneladas 60 neebe exporta ona nee rekolla husi Ataoru, Ulmera no mos Metinaro.

Iha fatin hanesan Vise Prezidente CCI-TL, Rui Castro hateten, TL hahu promove ninia produtu iha rai liur tanba haree ba ninia kualidade diak, hanesan Kafe Timor nia naran moris iha mundu, agora hahu tan fali ona Budu tasi, maske ho kuantidade kiik maibe hahu promove dadauk ona.

Hau hanoin governu ida nee tenke, tau importansia ba TL nia produtu sira neebe maka folin iha merkadu Internasional, hanesan kafe, Budu Tasi, kamii no sira seluk neebe nasaun presiza nee, ita tenke tau importansia atu nunee bele hasae kuantidade de produsaun iha rai laran,”informa nia.

Tuir obserbasaun katak, Budu Tasi laos folin deit iha merkadu Internasional maibe, faan iha merkadu rai laran mos folin tanba, povu TL barak maka konsume.

*STL